लानिपुखूया कंक्रिट चीकेत टेन्डर

थौं टेन्डर चायेकाः कंक्रिट चीकीम्ह ठेकेदार ल्ययेगु तयारी

येँ – तःभुखाचं क्षतिग्रस्त जूगु लानिपुखू पुनर्निर्माणया झ्वलय् करोडौं तका खर्च यानाः दयेकीगु कंक्रिट चीकीगु जूगु दु । थ्व संक्रिट चीकेत हानं मेगु लखौं तका खर्च जुइगु खँ धाःगु दु । येँ महानगरपालिकां थ्व कंक्रिट चीकेगु लागिं टेन्डर आह्वान याःगु खः । उकी प्यंगू कम्पनीतय्सं टेन्डर दर्ता याःगु खँ सीदुगु दु । येँ महानगरपालिकां वंगु वैशाख २२ गते पुनर्निर्माणया झ्वलय् प्रयोग जूगु कंक्रिट चीकेत बोलपत्र आह्वान याःगु खः ।

टेन्डर माग याःगु ई आइतवाः क्वचाःगु दु ।दर्ता जू वःगु प्यंगू निवेदनपाखें आः दकलय् कम सुयागु ध्यबा दु वयात हे ठेक्का बीगु खँ मनपाया सूचना अधिकारी बसन्त आचार्यं कनादिल । ठेकेदार ल्ययेगु ज्या थौं याइगु ग्वसाः दु । येँ मनपाया मेयर विद्यासुन्दर शाक्य ३ नम्बर प्रदेशया मेयर उपमेयर सम्मेलनय् ब्वति कायेत हेटौंडा वनाच्वंगुलिं टेन्डर थौं चायेकेत्यंगु खः ।

ठेकेदार ल्ययेवं हे ज्या सुरु याइगु खँ नं वय्कलं कनादिल ।भुखाय्या कारणं लानिपुखू व लानिपुखूया दथुइ च्वंगु बालगोपालेश्वर देगः क्षतिग्रस्त जूगु खः । लानिपुखू पुनर्निर्माणया झ्वलय् पुखू दयेकूबलय् प्यखेरं सिमेन्ट व डण्डी प्रयोग जुल धकाः स्थानीय जनतां विरोध यायेवं थ्व ज्या दिकूगु खःसा छ्यलेधुंकूगु कंक्रिट नं चीकेगु निर्णय याःगु खः ।

कंक्रिट चीकेधुंकाः मनपां हे लानिपुखूयात परम्परागत विधिपाखें पुनःनिर्माण याइगु खँ धाःगु दु ।मनपां लानिपुखू निर्माण यायेधुंकाः अन बालगोपालेश्वर देगलय् नं दछिया छक्वः जक मयासे न्हिंन्हिं हे खुल्ला यासें मनूत चाःहिले जीकेगु तयारी यानाच्वंगु खँ सीदुगु दु ।

जेठ १५ गते सुरु मजुइगु जुल

येँ मनपां थ्वहे वइगु जेठ १५ गतेनिसें लानिपुखू पुनःनिर्माण शुरु यायेगु धकाः ग्वसाः दयेकातःगु खःसां आः १५ गतेनिसें पुनःनिर्माण याये मफइगु खँ धाःगु दु । बरु १५ गते पुनर्निर्माण मखुसें अन दयेकातःगु कंक्रिट स्यंकेगु ज्या धाःसा सुरु यायेफइगु खँ धाःगु दु ।आः लानिपुखूया देगः पुरातत्व विभागं दयेकीगु व पुखू लिसें मेमेगु ब्व महानगरपालिकां दयेकीगु निर्णय जूगु दु ।

लानिपुखूया दथुइ च्वंगु बालगोपालेश्वर देगः पुलांगु हे शिखर शैलीं दयेकेगु खः लाकि २०७२ सालया तःभुखाय् ब्वये न्ह्यः गज्याःगु देगः दुगु खः वहे शैलीं दयेकेगु खः धइगु खँय् पुरातत्व विभाग व मनपा दथुइ विवाद पिहां वःगु दु । विज्ञ समूहं बिउगु सुझाव कथं अन पुलांगु शिखर शैलीं हे दयेकेमाः धकाः मनपां अडान काःगु खःसां पुरातत्व विभागं धाःसा भुखाय् ब्वये न्ह्यःया शैलीं हे दनेगु धकाः अडान कयाच्वंगु दु ।

सम्बन्धित बुखँ

LEAVE YOUR COMMENTS