किपुया लँय् स्वम्ह चिताधुं

किपू – किपुली वयाच्वंम्ह चिताधुँ (चितुवा) मालेगु निंतिं किपू नगरपालिकाया मेयर रमेश महर्जनं बन विभागयात इनाप याःगु दु । थौं न्हिनय् बन विभागय् फोन यासें मेयर महर्जन किपुली खनेदुम्ह चिताधुं यानाः स्थानीयतय्त हे खतरा ब्वलनाच्वंगु धासें चिताधुं ज्वनेत इनाप यानादीगु खः ।

बन विभागया डिएफओं फयांफतले कन्हय् मखुसा कंस किपुली वयाः चिताधुं मालेगु ज्या न्ह्याकेगु जानकारी बिउगु खँ मेयर महर्जनं कनादीगु दु ।

किपुली चिताधुं वयाच्वंगु हल्ला छुं न्हि न्ह्यवनिसें न्यनाच्वंगु खःसां म्हिगः बहनी छम्हेसिनं स्वम्ह चिताधुं त्रिभुवन विश्वविद्यालय वनेगु लँय् वयाच्वंगु खंकूगु खः । आशिष मल्लिक नांया उम्ह मनुखं लँय् वयाच्वंपिं चिताधुं किपा व भिडियो खिचे यानाः सामाजिक सञ्जाल फेसबुकय् नं तयाबिउगु दु । मल्लिकं म्हिगः बहनी ९ बजे पाखे बल्खुया सरस्वति देगः, श्रीकुमारी क्लबपाखे खंगु खँ सामाजिक सञ्जालय् न्ह्यथनातःगु दु ।

थ्वयां न्ह्यः किपूया हे न्याम्ह सिमापाखे नं चिताधुं वयाच्वंगु हल्ला न्यनाच्वंगु खँ स्थानीयतय्सं धाःगु दु ।

किपा ः आशिषा मल्लिकया फेसबुकपाखे‌ं