समावेशी आन्दोलनया निंतिं नेवाः समन्वय समिति

नेपाःया आदिवासी जनजातिनिसें मधेसी, दलित, मुस्मां, उत्पीडित अले लिउने लानाच्वंगु समुदायपाखें लिपांगु इलय् लोकसेवा आयोगया विज्ञापनय् आरक्षणया व्यवस्थायात बेवास्ता यात धकाः उकिया विरुद्धय् आन्दोलन याना वयाच्वंगु दु । उकिं आःया इलय् ‘आरक्षण बचाऔं आन्दोलन’ धकाः थीथी कथंया गतिविधि न्ह्याका वयाच्वंगु दुसा थप गतिविधि नं सार्वजनिक याःगु दु ।

तर नेवाःतय्सं लोक सेवाया विज्ञापनयात कयाः आरक्षण जक मखु समावेशीताया सवालयात हे ल्ह्वंगु दु । अझ नेवाःतय्सं ला ‘आरक्षण धइगु छगू निश्चित ईया निंतिं जक खः । अले सुनानं दयामायां बीगु कथं जक खः’ धासें वास्तवय् समावेशीताया मुद्दा हे ल्ह्वनेमाः धकाः उकिया निंतिं छगू ब्यागलं कथंया संरचना तकं दयेकूगु दु ।

समावेशीता धइगु मुलुकयात न्ह्यःने यंकेगु निंतिं सकसिगुं सहभागिता याकेगु खः । उकिया निंतिं समानुपातिक समावेशी हे आवश्यकता दु धइगु तायेका ‘समावेशी आन्दोलनया निंतिं नेवाः समन्वय समिति’ नीस्वंगु खः । नेवाःतय्गु राष्ट्रिय संगठन नेवाः देय् दबूयात कजि कथं ल्यःगु दु उगु समन्वय समितिइ ।

उकिया निंतिं नेवाः देय् दबूपाखें नायः नरेश ताम्राकारं समन्वय यानादीसा अथे हे छ्याञ्जे कथं आदिवासी जनजाति अभियन्ता श्रीकृष्ण महर्जनयात ल्यःगु दु । थीथी जातीय संगठन, नेवाः अभियन्तानिसें थीथी संघसंस्थाया प्रतिनिधित दुथ्याकाः १०१ सदस्यीय समावेशी आन्दोलनया निंतिं नेवाः समन्वय समिति नीस्वंगु खः ।

वंगु शनिवाः जूगु छगू भेलाया दथुइ उगु समिति नीस्वंगु खःसा भेलाय् नेवाः देय् दबूया नायः नरेश ताम्राकारं लोकसेवा आयोगं जांच कायेगु भाषा अंग्रेजी जक यायेगु धकाः धाःगु अवस्थाय् खस आर्यतय्सं उकियात अस्वीकार याना खस नेपाली भाषा नं तयेगु ज्या याःगु खँ न्ह्यथँसें गबलय् तक पूर्ण समावेशी समानुपातिक रुपं राज्यया हरेक निकायय् दक्व जातजाति व समुदाययापिं थ्यनीमखु अबलय् तक समृद्ध नेपाल निर्माण जुइ फइमखु धयादिल ।

वय्कलं आःया अवस्थाय् आरक्षणया व्यवस्थायात तकं हाचां गाःगु धइगु वास्तवय् संविधानया भावनायात हे अस्वीकार याःगु खः धकाः धयादिल । नेपाल आदिवासी जनजाति महासंघया अध्यक्ष जगत बरामं थ्व इलय् आन्दोलन यानाः थःपिनिगु वये धुंकूगु हक अधिकारयात तकं स्थापित याये मफुत धाःसा मुलुक प्रतिगमनपाखे वनी धयादिसें संघीयता तकं घरापय् लाइ धयादिल ।

झीगु थ्व आन्दोलन रहर मखु, बाध्यता खः धयादिसें संविधानय् जूगु व्यवस्था कथं ४५ प्रतिशत आरक्षणयात तकं स्वीकार मयाइगु अवस्थाय् आः आदिवासी जनजातित थःपिनिगु हक अधिकारया निंतिं आन्दोलन कुहां वयेगु बाहेकं मेगु विकल्प मदु धयादिल ।

जनजाति महासंघया छ्याञ्जे गोविन्द छन्त्यालं थ्व इलय् आरक्षणया व्यवस्थायात हाचां गायाः संविधानया भावनाया अःखः वंगु धइगु नेपाःया आदिवासी जनजाति, मधेसीनिसें दलित मुस्मांत नापं सकल समावेशीताया पक्षधरय्त छप्पँ याये हःगु ज्या खः धकाः धासें थुकियात कया झी सकलें छप्पँ जुयाः आन्दोलन यायेमाःगु खँय् बः बियादिल ।

आःया इलय् नेवाःतय्गु नेतृत्वय् द्वलंद्वः आदिवासी जनजाति व उत्पीडित समुदाय आन्दोलनय् कुहां वयेत तयार जुयाच्वंगु अवस्था दु धयादिल ।

नेवाः न्ह्यलुवाः डा. महेशमान श्रेष्ठं आःया अवस्थाय् समावेशीताया निंतिं आन्दोलन मयासे गा हे मगाः धासें थौं नेवाःतय्त सम्पदा, गुथि, संस्कृति, सतक विस्तार नापं थीथी थासं समस्यात हयाच्वंगु अवस्थाय् मंकाःकथं समाधानया निंतिं संविधानय् हे ब्यवस्था जुयाच्वंकथं समानुपातिक समावेशीता व स्वनिगःयात नेवाः स्वायत्त क्षेत्र घोषणा याकेगु कथंया आन्दोलनया यायेत तयार जुइमाः धयादिल ।