
एमाले अध्यक्ष केपी ओलीं थःत संविधान संशोधन यायेत तयार दुगु खँ धयादीगु दु । थुकिया निंतिं वय्कलं तराई केन्द्रीत दलतय्त खँल्हाबल्हाया निंतिं आह्वान नं यानादीगु दु ।
तराई मधेश केन्द्रीत दलतय् माग कथं संविधान संशोधन यायेगु खँय् न्ह्याब्लें विरोध याना वयाच्वंम्ह ओलीं म्हिगः पोखराय् जूगु छगू ज्याझ्वलय् न्ववासें थः संविधान संशोधन यायेत तयार दुगु व मधेशी दलतलिसे वार्ता यायेत तयार दुगु खँ धयादीगु खः ।
थः संविधान संशोधनया खँय् थः गबलें विपक्षय् मदुगु धासें वय्कलं पहाडयात अलग तयाः तराईयात जक छगू प्रदेश दयेकेगु खँय् जक थः विरोधी खः धयादीगु खः ।
पोखराय् रेडियो प्रसारक संघया ग्वसालय् जूगु छगू ज्याझ्वलय् संवोधनया झ्वलय् वय्कलं धयादीगु दु ‘मधेशया जनता जक नेपाली मखुला ? उमित समृद्ध, सुखी व अधिकार सम्पन्न दयेकेगु झीगु कर्तव्य मखुला । अनया विकास झीगु अभिभारा मखुला ? उकिं विभेद दुसा झासँ, सहलह यानाः तत्काल सच्चे यायेगु जुइ ।’
तराई केन्द्रीत दलतय्सं संविधान संशोधनया माग पूवंकीगु दललिसे सहकार्य यायेगु खँ धया वयाच्वंगु इलय् ओलीया थ्व संवोधनयात अर्थपूर्ण रुपय् काःगु दु । तर थःगु संवोधनय् वय्कलं न्हापालिपा थें ध्याचू नकेगु धाःसा त्वःतामदि । तराई केन्द्रीत दलतय्त थम्हं संशोधन सम्बन्धी प्रस्ताव तयागु प्रसंग न्ह्यथँसें वय्कलं धयादीगु दु, ‘देय् व जनताया पक्षय् संशोधन यायेत तयार दु, नापं च्वनाः खँल्हाबल्हा याये धायेवं वय्कःपिं संशोधन जुइ धकाः ग्यात थें च्वं, अले कांग्रेस पाखे वन । यदि जिमिगु लिसे मिले जूगु जूसा संशोधन ला पक्का हे जुइ, छाय्कि दुई तिहाई याउँक हे थ्यनी ।’
एमाले लिसे पार्टी एकता यायेगु लँय् वनाच्वंगु माओवादी केन्द्रया अध्यक्ष पुष्पकमल दाहालं नं संविधान संशोधन यायेफइगु खँ धाःगु दु । शुक्रवाः जूगु छगू पार्टी प्रवेश ज्याझ्वलय् न्ववासें वय्कलं मधेसी, आदिवासश्र जनजाति लगायतया अधिकार व सम्मान संविधानय् पूवंक सुरक्षित मजूनि धासें धयादीगु दु, ‘संविधान संशोधनया प्रक्रियापाखें ल्यं दुगु अधिकार चूलाकेफइ ।’
सत्ताय् वनेत तयार जुयाच्वंगु वामगठबन्धनया थुपिं शीर्ष नेतातय्सं आकाझाकां हाकनं संविधान संशोधनय् नुगः क्वचायेका हःगु धाःसा मधेसी दलतय्त ह्ययेकेगु कुतः याःगु कथं टिप्पणी जुयाच्वंगु दु ।
LEAVE YOUR COMMENTS