स्वनिगलय् अझं स्कुल चाली मखु

मस्तय्गु स्वास्थ्यय् खेलवाड याये फइ मखु ः नगरपालिका फोरम

येँ (नेपालभाषा टाइम्स) – कोरोना संक्रमणया कारणं बन्द जुयाच्वंगु स्वनिगः दुनेया स्कुलत आः तत्काल चालीगु सम्भावना मदुगु खँ धाःगु दु । स्वनिगलय् कोरोना संक्रमण न्हियान्हिथं अप्वया वनाच्वंगु कारणं स्वनिगःया मेयर फोरमं तत्काल स्कुल चायेके फइगु अवस्था मदुगु निष्कर्ष पिकाःगु खः ।

स्वनिगः मेयर फोरमया सचिव लिसें थिमि नगरपालिकाया मेयर मदनसुन्दर श्रेष्ठं ‘नेपालभाषा टाइम्स’ लिसे खँ ल्हासें थ्व खँ कनादीगु खः । थौंकन्हय् देय्न्यंकं ख्वाउँ अप्वया वनाच्वंगु कारणं कोरोनाया महामारी अझ अप्वये फइगु सम्भावना दुगुलिं स्कुल चायेकेगु सम्भावना मदुगु खँ वय् कलं कनादिल । ‘कोरोनाया महामारी सामान्य जुयाः फुक्कं क्षेत्र चालेधुंकाः जक अन्तिमय् स्कुल चायेकेगु जुइ’ मेयर श्रेष्ठं कनादिल ।

उकथं हे येँ महानगरपालिका शिक्षा विभाग प्रमुख नमराज ढकालं नं येँ मनपा दुनेया स्कुलत चायेकेगु सम्भावना मदुगु खँ कनादीगु दु। वय्कलं स्वनिगलय् न्हिथं कोरोना भाइरस संक्रमण जूपिनिगु ल्याः अप्वया वनाच्वंगु कारणं स्कुल चायेकेगु सम्भावना मदुगु खँ कनादिल । थौंकन्हय्को रोना भाइरसया संक्रमण अप्वया वनाच्वंसां नं मनूत हुलमुल जुइगु क्रम कम मजूगु कारणं स्कुल चायेकेगु सम्भावना मदुगु खँ कनादिल ।

प्रमुख ढकालं धयादी, ‘थौंकन्हय् तःधिकःपिंसं हे सरकारं बियातःगु स्वास्थ्य निर्देशिका पालना यानाच्वंगु मदु, स्कुलया चीधिकःपिं मस्तय्सं स्वास्थ्य मापदण्ड पालना याइगु सम्भावना मदु । अझ गुलिखे सामुदायिक स्कुलय् द्वलंद्वः मस्त ब्वनेगु यानाच्वंगु दु, अथे जुयाः मस्तय्गु स्वास्थ्य जोखिमय् तयाः स्कुल चायेकेगु खँ जुइ मखु ।’

वय्कलं हुम्लाया छगू स्कुल चायेकूबलय् अनया आपालं मस्त कोरोना संक्रमण जूगु उदाहरण बिसें धयादिल, ‘हुम्ला छगू गांया स्कुलय् ला उलिमछि मस्त प्रभावित जुल धाःसा स्वनिगलय् झन गुलि भयावह जुइगु जुइ ? स्वनिगलय् स्वनिगः जक मखु देय् न्यंकंया मस्त अध्ययन यानाच्वंगु दु । अथे जुयाः तत्काल स्कुल चायेकेगु खँ जुइमखु’ वय्कलं धयादिल ।

स्कुल चायेकेगु सम्भावना मदुसां सरकारं धाःसा थीथी तहया जाँच कायेत निर्देशन बियाच्वंगु सन्दर्भय् वय् कलं धयादिल, ‘भर्च्युअल मिडियापाखें गुकथं अध्ययन याकेगु धकाः ज्या जुयाच्वंगु दु, वहे कथं जाँच कायेगु व्यवस्था जुइगु खः ।’ संक्रमण अझं अप्वयाच्वंगु व स्कुल चायेकेगु सम्भावना नं मदुगु अवस्थाय् आः भच्र्युअल माध्यमं हे गय् यानाः ब्वनेज्यायात सहज याना यंकेगु धकाः थप तयारी जुयाच्वंगु जानकारी नं वय्कलं बियादिल ।

मेखे मेयर श्रेष्ठं नं आःया नितिं जाँच कायेमाःगु आवश्यकता जुल धाःसा भच्र्युअल मिडिया छ्यलेगु बाहेक मेगु विकल्प मदुगु खँ धयादिल । फाइनल जाँचया इलय् नं कोरोना संक्रमणया अवस्था स्वयाः जक विद्यार्थीतय्त भौतिक रुपं विद्यालयय् उपस्थित याकेगु वा मयाकेगु धकाः निर्णय जुइगु खँ नं कनादिल ।