सरकार गठन यायेत राष्ट्रपतिं म्हो ई बिउगु द्वपं

येँ (नेपालभाषा टाइम्स)÷चुनाव क्वचायेवं न्हूगु सरकार गठनया लागिं मंसिर १० गते तक संविधान कथं दावी याः वा धकाः राष्ट्रपति विद्यादेवी भण्डारीं बियादीगु ई प्रयाप्त मजूगु टिप्पणी याना हःगु दु ।

चुनाव सिधयाः त्याना वःपिं सांसदतय्गु शपथ ग्रहण गबले यायेगु व संसदया अधिवेशन गबले सःतेगु धकाः सहलह तकं जुइ मलाःनिवं राष्ट्रपतिं न्हूगु सरकार गठनया लागिं दावी याः वा धकाः आह्वान यानादीगु भचा याकनं जूगु खँ धयाहःगु दु ।

संसदया बैठक सःतेगु तयारी याना च्वंक च्वंक हे राष्ट्रपतिं सरकार गठनया आह्वान याःगुलिं सांसदतय्त शपथ ग्रहण निं याकेमाःगु खः लाकि मखु धइगु न्ह्यसः समेत पिहां वःगु खः ।

राष्ट्रपति भण्डारी एमालेया नेता जुयादीगु व थ्व चुनावय् एमाले बूगु जूगुलिं राष्ट्रपति भण्डारीं सुंलिसे सल्लाह तकं मयासे सरकार गठनया लागिं आह्वान यानादीगु द्वपं नं वय्कः यात बियाहःगु दु । राजनीतिक दलतय् दथुइ अझ नं सुयागु नेतृत्वय् सरकार गठन यायेगु धइगु खँय् खँल्हा–बल्हा तकं मजूनि । लिसें राजनीतिक दलतय् दुने संसदीय दलया नेता ल्ययेगु ज्या नं आः तक मजूनि । थज्याःगु अवस्थाय् राष्ट्रपति भण्डारीं सरकार गठनया दावी याः वा धकाः यानादीगु आह्वानं दलतय्त नं हथाय् चायेत बाध्य याना बिउगु खँ सूत्रं धाःगु दु ।

वय्कलं १० गते तकया दुने सरकार गठनया दावी याः वा धकाः आह्वान यानादीगु कारणं हे संसद सचिवालय नं सांसदतय्त शपथ ग्रहणया तयारीपाखे ब्वाँय् वनेमाःगु खँ धाःगु दु ।

सांसदतय्त बिहीवाः शपथ ग्रहण
प्रतिनिधिसभाय् निर्वाचित जूपिं सांसदपिंत कंस पुस ७ बजे शपथ ग्रहण याकीगु जूगु दु । कंस पुस ७ गते न्हिनय् १ बजे शपथ ग्रहण याकेगु तयारी संघीय संसद सचि–वालयं याःगु खः । वंगु मंसिर ४ गतेया निर्वाचनं त्याना वःपिं प्रतिनिधिसभाया २७५ म्ह सांसदया शपथ ग्रहणया तयारी संघीय संसद सचिवालयं याःगु खः ।

प्रतिनिधिसभाया सचिव गोपालनाथ योगीया कथं न्हूपिं सांसदपिनिगु शपथया नितिं सचिवालयं यानाच्वंगु तयारी अन्तिम चरणय् थ्यंगु दु । निर्वाचित जूपिं मध्ये दकलय् ज्याथम्ह सांसदयात राष्ट्रपति विद्यादेवी भण्डारीं शपथ ग्रहण याकेधुंकाः वयां लिपा मेपिं सांसदतय्त ज्याथम्ह दुजलं शपथ ग्रहण याकी । थुगु संसदय् दकलय् ज्याथम्ह सांसद राजमोया चित्रबहादुर केसी जुइ फइगु खँ धाःगु दु ।

थ्वहे झ्वलय् सुयां थःगु मांभासं शपथ ग्रहण याकेगु खःसा स्वन्हु न्ह्यः उकया जानकारी बीत संघीय संसद सचिवालयं धाःगु दु । प्रतिनिधिसभा नियमावली कथं सुं नं सांसदं थःगु मांभासं शपथ कायेगु खःसा स्वन्हु न्ह्यः हे सुचं बीमाःगु व्यवस्था दु । अथे जुयाः थौं हे शपथया तिथि सार्वजनिक याइगु ग्वसाः दु ।