साइकल यात्रापाखें नेपाः सुरक्षित दुगु सन्देश

२०७२ साल बैशाख १२ गतेया तःभुखाचं आपालं धनजनया क्षति याःगु ला जू हे जुल नापं नेपाःया आपालं ख्यलय् उकिया लिच्वः नं लाःगु जुल । भुखाचं नेपाःया आपालं सम्पदा क्षतिग्रस्त जुइवं छगूकथं उकिं नेपाःया पर्यटन ख्यलय् नं तसकं बांमलाक प्रभाव लाकूगु दु । सम्पदा क्षतिग्रस्त जुइवं नेपाः दुहां वइपिं पर्यटक म्हो जूगु सम्बन्धित सरोकारवालातय्सं धायेगु यानाच्वंगु दु ।

थ्व हे झ्वलय् तःभुखाय् ब्वःगु स्वदँ लिपा नेपाः सुरक्षित जूगु सन्देश बीगु ल्याखं स्वम्ह नेपाःमिं साइकल यात्रा यायेगु झ्वलय् नीगू देय्या भ्रमण याःगु दु । २०७२ साल बैशाख १२ या विनाशकारी तःभुखाचं क्षति लिपा नेपाः सुरक्षित जूगु सन्देश बीगु ल्याखं येँया अनिश ढकाल (२२), दिलीप क्षेत्री (२२) व पोखराया निर्मल बरालं (४२) निगू देय्या भ्रमण यानादीगु खः ।

बुद्धया देय् नेपाःया ध्वाँय्, बौद्ध ध्वाँय् ज्वनाः साइकल यात्राय् वंपिं स्वम्ह यात्रीं नेपाःया थीथी थाय् नापं भारत, बंगलादेश, श्रीलंका, म्यानमार, थाइल्याण्ड, लाओस, कम्बोडिया, ब्रुनाई, सिंगापुर मलेशिया, ताइवान, दक्षिण कोरिया, इजरायल, चिली, अर्जेन्टिना, बोलिभिया, ब्राजिल व अमेरिकाया भ्रमण यानादीगु खः ।

स्वम्हं साइकल यात्रीं छगू पत्रकार सम्मेलन यासें नेपाःयात विश्वया न्ह्यःने म्हसीकेगु ल्याखं थःपिं साइकल यात्राय् वनागु जानकारी बियादीगु दु । पत्रकार सम्मेलनय् विश्व साइकल यात्रीलिसें साइकल यात्राया संयोजक ढकालं सन् २०१६ डिसेम्बरय् पोखरां साइकल यात्रा पूरा यानागु जानकारी बियादीगु दु ।

साइकल यात्री डा. अमृत व अजित बरालया प्रेरणां हे थःपिं नं साइकल यात्राय् वनागु वय्कलं धयादिल । थःपिं वनेत स्वयागु देशय् भिसा लगे जुइत समस्या जूगु धासें वय्कलं आः वइगु निला लिपा युरोपं झिंनिगू देय्या भ्रमण यायेत्यनागु नं धयादिल । वइगु न्यादँया दुने विश्वया दक्वं महादेशया भ्रमण यायेगु थःपिनिगु विचाः जुयाच्वंगु वय्कलं धयादिल ।

ज्याझ्वलय् नेपाल पर्यटन बोर्ड संचालक समितिया दुजः दीपक मेहतां नेपाःया बारे साइकल यात्रापाखें विश्वयात म्हसीकेत सफल जूगु धासें वइगु दिनय् पर्यटन बोर्ड नं ग्वाहालि यायेत तयार दु धयादिल । उगु इलय् वय्कलं यात्रीं यात्रायात औचित्यपूर्ण दयेकेत विदेशी पर्यटकयात नेपालय् भ्रमण यायेगु वातावरण दयेकेमाः धयादिल ।

बोर्डया हे संचालक समितिया पुलांम्ह दुजः राजेन्द्र सापकोटां बुद्धया जन्मस्थलनिसें सगरमाथातकयात विश्वया न्ह्यःने म्हसीकेत यात्री महत्वपूर्ण भूमिका म्हितेमाःगु खँय् बः बियादिल । नेपाल पर्वतारोहण संघया महासचिव कुलबहादुर गुरुंगं विश्वया झिंप्यंगू तजाःगु च्वापुगुँमध्ये च्यागू च्वापुगुँ नेपालय् दुगु धासें उगु च्वापुगुँयात नं विश्वया न्ह्यःने म्हसीका बीमाःगु आवश्यक दु धयादिल ।

नेपाल एशोसियसन अफ टुर्स एण्ड ट्राभल्स एजेन्स (नाट्टा)या न्हापांम्ह उपाध्यक्ष अच्युत गुरागाइँनं थीथी देय्या यात्राय् वनेगु इलय् अनया दूतावास नापं समन्वय यानाः न्ह्याः वने फत धाःसा यात्रा अझ सार्थक जुइ धयादिल ।

अथे हे टे«किङ एन्जेन्सिवज एशोसियसन अफ नेपाल (टान)या वरिष्ठ उपाध्यक्ष खुमबहादुर सुवेदी, पुलांम्ह महासचिव सागर पाण्डे, नेपाल उद्योग वाणिज्या महासंघया केन्द्रीय दुजः रामशरण थपलिया लगायतया पर्यटन व्यवसायीतय्सं नं साइकल यात्रां नेपाःया पर्यटन प्रवद्र्धनय् तःधंगु ग्वाहालि जुइगु विश्वास प्वंकादीगु खः ।