प्रधानमन्त्री ओलीया सत्ता बचे यायेगु मेगु दाउ

येँ – प्रधानमन्त्रीया कुर्सि बचे यायेगु निंतिं थीथी तिकडम याना वयाच्वंम्ह प्रधानमन्त्री केपी ओली आः हाकनं न्हूगु दाउ ह्वाःगु दु । थ्व पालय् प्रधानमन्त्री ओलीं थःत भारतं हे पदं चिइकेगु निंतिं खेल म्हिताच्वंगु दावी यानादीगु दु । तर राजनीतिक विश्लेषकतय्सं धाःसा प्रधानमन्त्रीया थ्व धापू थःगु कुर्सि बचे यायेगु निंतिं जक ह्वाउ ‘राष्ट्रवाद’ या दाउ जूगु खँ धाःगु दु ।

प्रधानमन्त्री ओलीं आइतवाः मदन भण्डारीया ६९ औं जन्मजन्तीया झ्वलय् बालुवाटारय् हे जूगु ज्याझ्वलय् न्ववायेगु झ्वलय् थःत चीकेगु निंतिं भारत सक्रिय जुयाच्वंगु खँ धयादीगु खः । वय्कलं धयादीगु दु , ‘दिल्लीया सञ्चारमाध्यमत न्यनादिसँ, अनं हे सिइदइ कि गन गन छु छु जुयाच्वंगु दु धयागु । थनया होटलय् होटलय् जुयाच्वंगु गतिविधिं नं व हे क्यनाच्वंगु दु । एम्बेसीया सक्रियता, उकिं नं क्यनाच्वंगु दु ।…’

वय्कलं लिम्पियाधुरा, लिपुलेकया भूमि लित हयेगु निंतिं थःम्हं यानागु ज्या कारणं भारत तम्वया थःत चिइकेत सक्रिय जुयाच्वंगु खँ धयादीगु दु । ‘५८ दँ न्ह्यवनिसें लाका कयातःगु जमिन लित हयेत स्वयागु छु गल्ती जुल ? तर उबलय् निसें नेपाःया हे नेतात लगे जुयाच्वंगु दु, बहस यानाच्वंगु कि आः तुरुन्त हे केपी ओलीयात मचिइकुसे मजिउ ।’

न्हापा चीनलिसे व्यापार व पारवहन सन्धि यानाः लिहां वयाबलय् नं थःगु नेतृत्वय् दुगु सरकारयात क्वःथःगु दावी वय्कलं यानादिल । लिसें वय्कलं थ्व नं धयादिल कि आःया इलय् चीके धाःसा अःपुइ मखु । ‘नक्सा छापे यानागुलिं, संविधानय् नक्सा दुथ्याकागुलिं थ्व देय्या प्रधानमन्त्रीयात चिइके धकाः सुनां म्हगसय् खंकाच्वंगु दुसा वं थुइकेमाः कि आःया राष्ट्रियता उलि कमजोर मदु’ वय्कलं धयादीगु दु ।

थ्व झ्वलय् वय्कलं थः प्रधानमन्त्री पद त्वःते तयार मदुगु नं स्पष्ट रुपं धयादीगु दु, ‘जितः प्रधानमन्त्रीय पदय् च्वंच्वने मयः, तर थ्व इलय् जि चिलावन धाःसा नेपाःया पक्षय् न्ववायेगु आँट सुनां याइमखु, छाय्धाःसा कन्हय् कुन्हु हे बर्खास्त जुइ ।’

प्रधानमन्त्री ओलीं राष्ट्रियताया बः कयाः भारतं हे थःत चीकेगु कुतः यानाच्वंगु धाःसां थ्व वय्कःया पद बचे यायेगु तिकडम जक जूगु खँ राजनीतिक विश्लेषकतय् धापु दु । राजनीतिशास्त्री कृष्ण पोखरेलं बिबिसीलिसे खँ ल्हासें धयादीगु दु, ‘आः प्रधानमन्त्रीं छु न्ववानादीगु व थःगु सत्ता वनी ला धयागु भयं ग्रस्त जूगु जक खः धयागु जितः ताः ।’

मेम्ह राजनीतिशास्त्री हरि शर्मां प्रधानमन्त्रीया थ्व धापु वःगु धयागु बुुलुहुं थःगु आत्मविश्वास तंका वनाच्वंगु जक खः धयादीगु दु । अथेहे मेपिं यक्व हे राजनीतिक विश्लेषकतय्सं न्हापा नं ओली सरकार क्वःदुगु धयागु पार्टी दुनेया हे आन्तरिक कारणं जूगु व आः वय्कःयात दबाब वनाच्वंगु नं पार्टीया हे आन्तरिक कारण खः धाःगु दु ।

नेपाःया नक्सा हिलेगु ज्या प्रधानमन्त्री याकःचिया कुतलं जूगु मखु, थुकी सत्तारुढ, प्रतिपक्षी लिसें फुक्कं दलया पूवंक समर्थन दुगुलिं जक सम्भव जूगु खः । पार्टी दुने बल्लाना वःगु गुट, सरकारयात जनसमर्थन मदया वनाच्वंगुलिं हे प्रधानमन्त्री ओलीं ध्यान मेखे यंकेगु निंतिं नक्सा हिलेगु मुद्दा न्ह्यःने हःगु, मखुसा उलि नं याइमखु धाइपिं नं यक्व मनूत दु । आः नं कोरोना संक्रमण, लकडाउन, पिसिआर परीक्षण, व्यापार व्वसाय धरासायी जुया वनं नं सरकारं छुं सम्बोधन यायेमफुगुलिं जुयाच्वंगु विरोधयात मत्थर यायेगु निंतिं जक भारतं थःत चीकेत्यंगु खँ न्ह्यःने हःगु विश्लेषकतय् धापू दु ।