इतुंबहालय् आर्य नामसंगीति पाठ

येँ(नेपालभाषा टाइम्स)- श्रीभाष्कारदेव संस्कारित केशचन्द्रकृत पारावत महाविहार इतुंबहालय् वंगु शनिवाः आर्य नामसंगीति स्तोत्र पाठ यायेगु ज्या जुल । थथुुपुइँ आचार्य गुथि संरक्षण समिति अन्तर्गतया नामसंगीति स्तोत्र पाठ उपसमितिया ग्वासलय् उगु ज्याझ्वः जूगु खः । उपसमितिपाखें संल्हूपतिकं थीथी बहालय् न्ह्याका वयाच्वंगु ज्याझ्वःकथं वंगु भदौ १ गते शुक्रवाः इतुंबहालय् स्तोत्र पाठ यायेगु ज्या जूगु खः ।

उपसमितिया राजु वज्राचार्यया नेतृत्वय् जूगु नामसंगीत स्तोत्र पाठ यायेगु ज्याझ्वलय् दिपेन्द्र वज्राचार्यं ज्याझ्वःया बारे जानकारी बियादीगु खः । उगु इलय् इतुंबहाः सुधार समाजया नायः प्रज्ञारत्न शाक्यं इतुंबहाःया म्हसीका बियादीगु खःसा मू थाय्पा मणिरत्न शाक्यं नं नुगःखँ तयादीगु खः ।

उपसमितिया ग्वसालय् नियमित रुपं न्ह्यानाच्वंगु नामसंगीति स्तोत्र पाठ यायेगु ज्याझ्वः अमर वज्राचार्यया संयोजनय् जुया वयाच्वंगु खः । ज्याझ्वलय् आपालं स्थानीयतय्सं नं नामसंगीति वाचन याःगु खः ।

स्तोत्र पाठ याये न्ह्यः इतुंबहाःया मू थाय्पा मणिरत्न शाक्य गुरुजु राजु वज्राचार्यं क्वाःपाःद्यःया पुजा यानादीगु खः ।

सम्बन्धित बुखँ

LEAVE YOUR COMMENTS