कोरोना संक्रमित सर्लाहीया मिसा वैशाख ३० गते येँय् वःम्ह

येँ – स्वास्थ्य तथा जनसंख्या मन्त्रालयं म्हिग सुथय् छगू विज्ञप्ति पिथना देय्न्यंक थप ६म्हेसित कोरोना भाइरसया संक्रमण जूगु पुष्टि यात । उकी मध्ये छम्ह खः, सर्लाही रामनगरया-४य् छेँ जुम्ह १८दँया मिसा । तर उम्ह मिसा धाःसा प्यन्हु न्ह्यः वैशाख ३० गते हे येँ वयेधुंकूम्ह लानाच्वन ।

लकडाउनया ईलय् निगः मोटरसाइकलय् प्यम्ह मनूत सर्लाहीं येँ वःगु खः । ३० गते येँ थ्यनेवं बुढानिलकण्ठ नगरपालिका अन्तर्गत कपनय् च्वंवंगु खः । ३० गते कपनया तेन्जिङ चाेकय् च्वंम्ह उमित कन्हय् कुन्हु स्थानीयतय्सं खनेवं कोरोना परीक्षण यायेगु निंतिं छ्वःगु व प्यम्ह मध्ये छम्हेसिया जक रिपोर्ट पोजेटिभ वःगु खः ।

संक्रमित जुम्ह मिसा कपनया छगू फर्निचर पसलय् ज्या याइम्ह जूगु नगरपालिकाया मेयर उद्धव खरेलं धयादिल । आः उम्ह मनूतया ट्राभल हस्ट्रि स्वयेगु व कन्ट्याक्ट ट्रेसिङ यायेगु ज्या जुयाच्वंगु दु ।

‘वैशाख ३० गते सलार्ही नं येँया कपनय् वःपिं प्यम्ह मध्ये छम्हेसित संक्रमण खनेदत ।’ मेयर खरेलं धयादिल, ‘संक्रमित मिसा थन जक मखु येँया जडिबुटीपाखे नं वंगु खबर दु, ट्राभल हस्ट्रि स्वयेगु व कन्ट्याक्ट ट्रेसिङ यायेगु ज्या जुयाच्वंगु दु ।’

आः कपनया १०, ११ व १२ वडाय् सुनं मनूतय्त पिहांवयेमबीगु कथं सुरक्षा व्यवस्था क्वतुकेगु तयारी जुयाच्वंगु दु । अथेहे संक्रमित मिसानाप सम्पर्कय् वःपिनिगु पीसीआर विधिपाखे परीक्षण यायेगु तयारी नं जुयाच्वंगु खँ नं मेयर खरेलं जानकारी बियादिल ।