ने. सं. ११४४ कौलाथ्व पारू - नःलास्वनेगु

एमाले व माओवादी निगू पार्टी एकीकरण -‘जेटय् निम्ह हे पाइलट दइ’

येँ – निगू वाम–पन्थी पार्टी एमाले व माओवादी एकता जुयाः छगू हे पार्टीइ निम्ह निम्ह अध्यक्ष तःगु खँयात कयाः प्रधानमन्त्री लिसें एकता जूगु न्हूगु पार्टीया निम्ह मध्ये छम्ह अध्यक्ष केपी ओलीं धयादीगु दु – जेटय् निम्ह हे पाइलट दइ ।
म्हिगः जूगु एकता सभाय् न्ववासें वय्कलं धयादिल, ‘थ्व निम्ह निम्ह अध्यक्ष छु याःगु धइथें नं जुयाच्वन जुइ । तर थ्व टेम्पु चले याये थें मखु । जेटय् निम्ह हे पाइलट दइ ।’ वय्कलं आः वइगु चुनावय् थ्व एकीकृत जूगु वाम पार्टीं दुई तिहाई मखु तीत चौथाई बहुमत हइगु दावी नं यानादिल ।

अथे हे न्हूगु नेपाल कम्युनिष्ट पार्टीया मेम्ह अध्यक्ष पुष्पकमल दाहाल प्रचण्डं आः जूगु एकताया छगू हे जक उद्देश्य धइगु जनतायात सुख बीगु लागिं हे खः धयादिल । वय्कलं धयादिल, ‘थ्व एकता सुयां विरुद्ध लक्षित मखु, सामाजिक न्याय सहितया समृद्धिपाखें देशया आर्थिक विकास यायेगु हे थुकिया मूल उद्देश्य खः।’

कम्युनिष्ट न्ह्याक्व हे क्रान्ति यानाः वःपिं जूसां सत्ताय् वनेधुंकल कि उपिं थुलि भ्रष्ट जुइ कि उमित जनतां हे ज्वनाः स्याये माःगु तकया अवस्था वःगुदु धासें नेपालय् अज्याःगु अवस्था मवयेमा धकाः नं थ्व एकता आवश्यक जूगु खः ।’
न्हापा नेपाःया कम्युनिष्ट कार्यकर्तात क्रान्तिइ थः न्हापां सी दयेमा धकाः ल्वाः वइगु खःसा थौंकन्हय् थः न्हापां मन्त्री जुइ दयेमा धकाः ल्वाः वयेगु जुयाच्वंगु खँ नं लुमंकादिल ।

ज्याझ्वलय् वरिष्ठ नेता माधव नेपालं पार्टी एकताया ६ बुँदे घोषणापत्र ब्वनाः न्यंकादीगु खः । घोषणापत्र जारी यासें वय्कलं पार्टीया सिद्धान्त ‘जनताया जनवाद’ जुइ व निर्देशक सिद्धान्त माक्र्सवाद व लेनिनवाद जुइगु खँ नं स्पष्ट यानादिल ।

पदाधिकारीपिं

‘नेपाल कम्युनिष्ट पार्टी’ या स्थायी समितिया दुज ४५ म्ह तःगु दु गुकी एमालेपाखें २६ म्ह व माओवादीपाखें १९ म्ह दुथ्याः । अथेहे केन्द्रीय कमिटीइ ४४१ म्ह दुजः दइ गुकी एमालेपाखें २४१ व माओवादीपाखें २०० म्ह दइ । ९ सदस्यीय हाइकमाण्ड दइ गुकी केपी ओली, पुष्पकमल दाहाल ‘प्रचण्ड’, झलनाथ खनाल, माधवकुमार नेपाल, वामदेव गौतम, नारायणकाजी श्रेष्ठ, ईश्वर पोखरेल, रामबहादुर थापा व बिष्णु पौडेल दुथ्याः । पार्टीया महासचिव बिष्णु पौडेल व प्रवक्ता नारायणकाजी श्रेष्ठ नियुक्त जूगु दु ।