खुलामञ्चय् अकुपाई टुँडिखेल

येँ – खुल्ला तिंख्यःयात खुल्ला यायेमाः धइगु माग तसें म्हिगः मनू–मनू माः हनाः तिंख्यः घेरे यायेगु ज्या जुल । ज्याझ्वलय् पुलांम्ह प्रधानमन्त्री डा. बाबुराम भट्टराईनिसें कयाः पुलांम्ह भीसी डा. केदारभक्त माथेमा, पत्रकार रवि लामिछामे व ऋषि धमलां समेत ब्वति काःगु खः । ज्याझ्वलय् पुलांम्ह रक्षामन्त्री लिसें कांग्रेस सांसद भिमसेनदास प्रधानं नं ब्वति कयादीगु खः ।

लुमंकेबहः जू, वय्कः रक्षामन्त्री जुयाच्वंगु इलय् हे नेपाली सेनां चीधंगु तिंख्यः दुने नक्सा तकं पास मयासे स्वतँजाःगु पुस्तकालय भवन निर्माण याःगु खः । उगु इलय् नं येँया स्थानीय नेवाः समुदायं वय्कःयात नापलानाः अबले निर्माण जुयाच्वंगु उगु भवन दयेकेगु पने माल धकाः इनाप याःगु खः ।

‘अकुपाई टुँडिखेल’ नां तयाः म्हिगः याःगु ज्याझ्वलय् तःधंगु तिंख्यःनिसें कयाः चीधंगु तिंख्यः व रंगशाला तकं घेरे यायेगु ग्वसाः दुगु खः । तर सहभागी मनूतय् ल्याः म्हो जूगुलिं खुलामञ्च छकू जक घेरे यायेगु ज्या जुल । थ्व ज्याझ्वलय् नेपाली कांग्रेस, संघीय समाजवादी पार्टी व विवेकशील पार्टीया मनूत यक्व दुगुलिं थुकियात सत्तारुढ नेकपा विरुद्धया राजनीतिक पलाः धकाः व्याख्या याःगु दु ।

म्हिगःया ज्याझ्वः लिपा आः स्वला तक हरेक शनिवाः खुलामञ्चय् वयाः प्रदर्शन यायेगु ग्वसाः दयेकूगु दु । स्वला तक अन थीथी ज्या याइगु ग्वसाः दु । येँ महानगरपालिकाया मेयर विद्यासुन्दर शाक्यं धाःसा वीर अस्पताल व दरवार स्कूलया निर्माण ज्या सिधयेधुंकूगु कारणं आः निलाया दुने हे तिंख्यः दुने तयातःगु फोहोर चीकीगु जुइधुंकूगु कारणं उगु फोहोर चीकेमाल धकाः थज्याःगु प्रदर्शन यानाच्वनेम्वाःगु खँ कनादीगु दु ।