देउवा व दाहाल दथुइ कचवं तच्वल
येँ (नेपालभाषा टाइम्स)- गठ बन्धनया सरकार गठन यायेगु सहमति दुसां उकिया नेतृत्व सुनां यायेगु धइगु खँय् ब्वलंगु विवादं यानाः गठबन्धन दुने तनाव ब्वलंगु दु । माओवादी केन्द्रया अध्यक्ष पुष्प कमल दाहालं गठबन्धन दुने पालंपाः सरकार चले यायेगु सहमति दुसां न्हापां थम्हं निं सरकार चले याये दयेमाः धकाः माग यायेवं थ्व तनाव पिहां वःगु खः ।
सूत्रतय्सं धाःकथं यदि थःत न्हापां प्रधानमन्त्री जुइगु अवसर मबिल धाःसा माओवादीं एमालेया समर्थन कयाः सरकार दयेकीगु सम्भवना दु । उकिया लागिं दाहालयात एमालेपाखें बचं वने धुंकूगु सूत्रया दावी दु । सूत्रया कथं एमालें दाहालयात प्रधानमन्त्री दयेकाः राष्ट्रपति धाःसा थःगु भागय् कायेत स्वयाच्वंगु दु ।
अथे हे एमालें थज्याःगु हे प्रस्ताव कांग्रेसयात नं बियाच्वंगु सूत्रया दावी दु । यदि माओवादी गठबन्धनं पिहां वन धाःसा कांग्रेसयात पिने च्वनाः जूसां समर्थन यायेगु बचं एमालें बियातःगु सूत्रया दावी दु । तर उकिया लागिं नं एमालें राष्ट्रपति पद छगू थःगु भागय् लाकेमाः धकाः माग यानाच्वंगु दु ।
नेपाली कांग्रेस धाःसा राष्ट्रपति व प्रधानमन्त्री निगुलिं पद थःत हे माः धइगु लाइनय् दु । माओवादीं यदि थःपिंत न्हापां प्रधानमन्त्री जुइगु अवसर बिल धाःसा राष्ट्रपति पद कांग्रेसयात बी धइगु प्रस्ताव न्ह्यःने यंकूगु दु ।
थ्वहे झ्वलय् कांग्रेसं माओवादी यदि गठबन्धन त्वःताः पिहां वन धाःसा एमालेलिसे जानाः सरकार गठन याये फइ वा मफइ धकाः नं ल्याःचाः पिकायेगु शुरु याःगु दु । कांग्रेसयात माधव नेपाल नेतृत्वया नेकपा (एस) या क्वातुगु समर्थन दुगु जुयाः माओवादी व एमाले जक जानाः नं सरकार गठन याये फइगु सम्भावना मदु । उकिं थज्याःगु अवस्थाय् एमालेपाखें रवि लामिछानेया रास्वपायात थःगु पक्षय् हयेत स्वयाच्वंगु खँ सीदुगु दु ।
चुनाव न्ह्यः गठबन्धन छप्पँ जुयाः न्ह्यःने वःगु जूसां आः चुनाव लिपा धाःसा प्रधानमन्त्री जुइगु खँयात कयाः गठबन्धन कुचा जुइगु सम्भावना प्रवल जुया वःगु दु । फुकस्यां फुकलिसे अलग अलग वार्ता यानाच्वंगु जुयाः अन्तिमय् वनाः एमाले व कांग्रेसया हे सरकार वये फइगु खँ नं धयाहःगु दु ।
LEAVE YOUR COMMENTS