८५४ बिघा सरकारी जग्गा मेपिंत

येँ – नेपाःया सरकारय् अधिनय् लानाच्वंगु ८५४ विघा जग्गा थीथी निकायतय्सं दां दांछि हे मबिसे भोग चलन यानाच्वंगु तथ्यांक सार्वजनिक जूगु दु । सरकारया अधिनय् लानाच्वंगु थ्व जग्गा देय्या ३५० गू संस्थातय्सं भोग चलन यानाच्वंगु खः । थ्व जग्गा पार्टी कार्यालय, क्लब, देगः, प्रतिष्ठान आदि थेंज्याःगु निकातय्सं भोग चलन यानाच्वंगु खः ।

अथे भोग चलन याःगु वापत उमिसं सरकारयात न्यागः ध्यबा नं मपूगु खँ सीदुगु दु । सरकारं अथे दां मपुसे भोग चलन यानाच्वंगु जग्गायात सरकार मातहत हयेगु लागिं थुकियात लीज प्रक्रियाय् यंकेगु धकाः निक्वः तक सार्वजनिक सुचं पिकायेधुंकूगु दु । तर उकियात सुनानं वास्ता धाःसा मयाः ।

यदि लीज प्रक्रियाय् वन धाःसा अज्याःगु जग्गा सरकारय् दर्ता जुइ लिसें भोग चलन यानाच्वंगु निकायलिसे छगू लिखित सम्झौता जुइ । उगु सम्झौताक कथं करिब ३० दँ तक जक भोग चलन याये खनी । उकिया बाः नं निश्चित रकम तक पुले माली । अले थ्व बाः नं दँय्दसं थहां वनी । अले उकिया निश्चित शर्त नं दइ ।

अज्याःगु शर्त पालना मयात धाःसा सम्झौता दथुइ हे त्वाःथलेगु ज्या नं जुइफु । थौंकन्हय् सरकारयात दां दांछि हे मपुसे भोग चलन यानाच्वंगु अज्याःगु गुलिखे जग्गा सम्बन्धित संस्थातय्सं छेँ दनाः बालं नं बियातःगु दु । गुलिस्यां मेपिंत लिजय् बियातःगु दुसा गुलिस्यां धाःसा उपयोग मयासे खाली नं तयातःगु दु ।

सरकारयात ध्यबा मबिसे जग्गा कयाः मेथासं धाःसा ध्यबा कयाः आम्दानी यानाच्वंगुलिं आः उकियात पनेगु लागिं नं सरकारं जग्गा फुक्क लीजय् बीगु प्रक्रिया शुरु यायेमाःगु खँ धाःगु दु । यदि सरकारया सुचंयात वास्ता मयात धाःसा छु यायेगु धकाः खँ जुयाच्वंगु दु ।