बौद्ध विद्वान हर्षमुनिया लुमन्तिइ गुणानुस्मरण ज्याझ्वः

येँ – युवा बौद्ध समूहया ग्वसालय् समूहया संस्थापक नायः, वरिष्ठ सल्लाकालिसें बौद्ध विद्वान हर्षमुनि शाक्यया लुमन्तिइ गुणानुस्मरण ज्याझ्वः जुल । थनया धल्कोय् च्वंगु संघाराम विहारय् ज्याझ्वः भिक्षु उपतिस्स महास्थविरं पंचशील बियाबिज्यासें परित्राण पाठ यानाः न्ह्याकूगु ज्याझ्वलय् थीथी व्यक्तित्वपिंसं मदुम्ह शाक्यं बौद्ध ख्यःया विकास व बौद्ध जनजागरण हयेगु निंतिं म्हितादीगु भूमिका व वय्कःया योगदानयात कयाः चर्चा यानादिल ।

ज्याझ्वलय् नवासें बौद्ध विद्वान देवकाजी शाक्यं मदुम्ह हर्षमुनिं बौद्ध ख्यःयात तब्या यायेगु निंतिं बियादीगु योगदानयात झीसं गबलें नं ल्वःमंके मजिउगु धासें वय्कः छम्ह हस्तकलाय् नं निपुणम्ह व्यक्तित्व जूगु चर्चा यानादिल ।

समूहया पुलांम्ह नायःलिसें सल्लाहकार त्रिरत्न तुलाधरं युवा बौद्ध समूह नीस्वनेत हर्षमुनिजुं म्हितादीगु योगदानयात कयाः चर्चा यानादिसें समूह नीस्वनाः बौद्ध जनजागरण अभियानया निंतिं वय्कलं आपालं महत्वपूर्ण भूमिका म्हितादीगु लुमंकादिल । लिसें वय्कःया हे योगदान व बौद्ध जनजारण अभियानया लिच्वःकथं थौं थीथी जनजातित नं बौद्ध ख्यलय सक्रिय जुया वःगु वय्कलं न्ह्यथनादिल ।

मेम्ह बौद्ध विद्वान डा. गौतमवीर वज्राचार्यं मदुम्ह हर्षमुनि झी सकसितं उर्जा बीफुम्ह व्यक्तित्वया धनी जूगु धासें वय्कःया प्रेरणाकयाः झीपिं नं कर्मशील जुइगु स्वयेमाः धयादिल । लिसें वय्कः छम्ह वीर्यवान व कर्मशील व्यक्तित्व जूगु नं वय्कलं धयादिल ।

शाक्य महाविहार संघया मूछ्याञ्जे संघरत्न शाक्यं वय्कःया बौद्धिक व्यक्तित्वयात उचित मूल्यांकन यानाः हे संघपाखें वय्कःयात शाक्यरत्न उपाधिपाखें सम्मान यानागु चर्चा यानादिसें हर्षमुनिजुं शाक्यतय् बारे क्वातुक अध्ययन अनुसन्धान यानाः पिथनादीगु सपूmया थौं शाक्यतय् बारे सीकेत तःधंगु आधार जूगु धयादिल ।

समूहया पुलांम्ह नायःलिसें बौद्ध विद्वान डा. त्रिरत्न मानन्धरं म्हिगःया दिनय् समूहं न्ह्याकूगु बौद्ध जनजागरण अभियान थेंज्याःगु ज्याझ्वः आः हाकनं न्ह्याकाः बौद्ध जागरणय् उर्जा तनेमाःगु खँय् बः बियादिल ।

बौद्ध विद्वान शान्तरत्न शाक्यं नं नुगःखँ तयादीगु ज्याझ्वलय् समूहया छ्याञ्जे रजनी ताम्राकारं सुभाय् देछनादीगु खःसा ज्याझ्वः समूहया नायः मदनरत्न तुलाधरया सभापतित्वय् जूगु खः । भिक्षु उपतिस्स महास्थविरं ओवाद बियाबिज्यासें पुण्यानुमोदन नं यानाबिज्याःगु ज्याझ्वलय् थीथी संघसंस्थाया प्रतिनिधिलिसें आपालं उपासकउपासिकापिनिगु सहभागिता दुगु खः ।

 

सम्बन्धित बुखँ

LEAVE YOUR COMMENTS