मोदीया धम्की विरुद्ध कंग्रेस राष्ट्रपतियाथाय्

‘कांग्रेसया नेतात न्हाय्पं बिया न्यँ, यदि छिकपिंसं सीमा नाघे जुल धाःसा तसकं थाकुइफु । जि ला मोदी खः ।’भारतया दक्षिणपश्चिमी राज्य कर्नाटकया हुबलीइ मे ५ तारिखय् प्रधानमन्त्री नरेन्द्र मोदीं भाषण बिउबलय् छ्यःगु भाय् खः थ्व । थ्व भाय्यात कयाः कांग्रेस आई नं आपत्ति प्वंकुसें राष्ट्रपतियात पौ च्वःगु दु । मोदीं अभद्र भाय् छ्यःगु द्वपं कांग्रेसया दु ।

थ्व विषययात कयाः भारतया पुलांम्ह प्रधानमत्री मनमोहन सिंह राष्ट्रपति रामनाथ कोविन्दयात छपु पौ च्वयाः कडा शब्दं मोदीया आलोचना यानादीगु दु । पतिइ प्रधानमन्त्री मोदीं थःगु पदीय मर्यादा उल्लंघन याःगु खँ धयाःगु दु । राष्ट्रपतियात छ्वःगु पतिइ सिंहया लिसें कांग्रेसया मेमेपिं वरिष्ठ नेतातय्सं नं हस्ताक्षर यानातःगु दु ।

पतिइ कांग्रेसया नेतृत्वयात प्रधानमन्त्रीइ धम्की बिउगु तसकं निन्दनीय जूगु खँ न्ह्यथँसें धयातःगु दु, ‘१.३ अर्ब जनसंख्या दुगु छुं नं संवैधानिक व लोकतान्त्रिक सरकार दुगु देशय् प्रधानमन्त्रीया भाय् थज्याःगु जुइफइमखु । चाहे सार्वजनिक रुपं जुइमा वा व्यक्तिगत रुपं, थज्याःगु भाय् स्वीकारयोग्य जुइफइमखु ।’