ने. सं. ११४६ बछलाथ्व पारू - बुंगद्यःरथय् तइगु / याेगबीरसिं बुदिं

भाषासेवी विष्णु चित्रकार मंत, कन्हय् जगतसुन्दर ब्वनेकुथिइ अन्तिम श्रद्धाञ्जलीया निंतिं तइगु

येँ (नेपालभाषा टाइम्स)- नेपालभाषाया व्याकरणविद लिसे भाषा सेवी, जगतसुन्दर ब्वनेकुथिया संस्थापक लिसे सञ्चालक समितिया न्वकू व नेवाः आन्दोलनया न्ह्यलुवा विष्णु चित्रकार मंत ।
मुक्तिनाथ दर्शन यायेगु निंतिं पासापिं लिसे मुस्ताङ भ्रमणय् झायाच्वंम्ह वय्कः थौं सुथय् ३ बजेपाखे आकाझाकां अन हे मदुगु खः । वय्कः ७६ दँ दुम्ह खः । मुक्तिनाथ चाःहिउझाःम्ह वय्कःयात अनया होटलय् द्यनाच्वंगु इलय् हृदयघात जूगु खँ धाःगु दु । हृदयघाट जुइवं जोमसोम अस्पतालय् यंकूगु खःसा अन हे वय्कः मदुगु खः । वय्कः मदुगु सीवं वय्कःया म्ह्याय् सिचु चित्रकार उखेपाखे झाःगु दु ।
वय्कःया सीम्ह थौं सनिलय् हे जोमसोम अस्पतालं येँय्पाखे हःगु खःसा कन्हय् सुथय् ६ बजे पाखे थ्यनीगु खँ धाःगु दु । वय्कःयात अन्तिम श्रद्धाञ्जली बीगु निंतिं कन्हय् मंगलवाः सुथय् ८ बजे निसें १० बजे तक जगत सुन्दर ब्वनेकुथि लखतीर्थय् तइगु जूगु दु । श्रद्धाञ्जली लिपा वय्कःया अन्त्येष्टि याइगु खँ धाःगु दु ।
मदुम्ह देवदास मानन्धरलिसे जानाः नेपाल संवत्या नगुमा तिथि गणना समय तालिका पिथनेगु ज्याय् न्ह्यचिलादीम्ह वय्कलं नेपाल लिपि युनिकोड दर्ताया निंतिं नं ज्या यानादीगु खः । साहित्यय् बाखं, चिनाखँ नं च्वयादीगु दुसां वय्कः मुलतः नेपालभाषाया व्याकरणविद् खः । वय्कलं नेपालभाषाया व्याकरण सम्बन्धी तःगू सफू च्वयादीगु दु । वय्कः नेवाःशिक्षा गुथिया कजि, नेवाः देय् गुथि नेपालमण्डलया पुलांम्ह मू छ्याञ्जे खः । उकथं हे वय्कः अन्तरकलेज नेपालभाषा साहित्य पालाया पुलांम्ह नायः लिसें आदिवासी नेवाः राजनीतिक अभियानया हामापुचःया दुजः नं खः ।
वय्कः छगू इलय् नेपालभाषा पत्रिका (न्हिपौ) समाचार सम्पादक जुयादीगु दुसा झी लय्पौ, जः दँपौ, देवदास लुमन्ति गुथि व थीथी लुमंति पौ सम्पादन यानादीगु दु । लिसे वय्कलं सितु पत्रिकाया लिसें थीथी दँपतिइ चिनाखँया लिसें समालोचना नं च्वयादीगु दु ।
२०२० सालं निसें नेपालभाषा आन्दोलनय् ब्वति कयादीम्ह वय्कलं २०२२ सालय् जूगु नेपालभाषा आन्दोलनय् नं सक्रिय भूमिका म्हितादीगु खः । मदुम्ह चित्रकारया जहान भाषासेवी विद्या चित्रकार व म्ह्याय् सिचु चित्रकार दी ।