एनपीपीएया नायः पदय् शान्ति श्रेष्ठ
यँ (नेपालभाषा टाइम्स)÷अमेरिकाय् च्वंपिं नेवाःतय्सं स्वनातःगु संस्था नेपाः पासा पुचः अमेरिकाय् (एनपीपीए) या न्हूम्ह नायः पदय् मय्जु शान्ति श्रेष्ठयात ल्यःगु दु । ने.सं. ११४६ न्हूदँ हना लिसें जूगु संस्थाया ३५ क्वःगु दँमुँज्यां मय्जु श्रेष्ठयात न्हूम्ह नायः ल्यःगु खः ।
मुँज्यां वय्कःया नां घोषणा यायेवं वय्कलं स्वीकृति न्वचु बिसें थःगु कार्यकालय् यायेगु ज्याया बारे कनादीगु खः । थुकिया नापं बहालवाला नायः मनोहर श्रेष्ठ पदमुक्त जुयादीगु दु । मनोहर श्रेष्ठ थौंकन्हय् हलिं नेवाः दबू (डब्लुएनओ) या नायः जुयादीगु दु । मुँज्यां संस्थाया न्हापांम्ह न्वकु पदय् सुमन तुलाधर, निम्हम्ह न्वकु प्रविन ताम्राकार, मू छ्यांज्ये नीति माथेमा, छ्यांज्ये समिर श्रेष्ठ, दांभरि एलन महर्जन व लिउदांभरि पदय् रमिता महर्जनयात नं ल्यःगु दु । मू दुजः पदय् डा. राजु तमोट, मगन श्रेष्ठ, जयश्वर श्रेष्ठ, कञ्चन मुस्याजु, सबिना सुवाल, प्रनिता श्रेष्ठ शाक्य, सन्ध्या महर्जन व सुदिप मुज्याजु मनोनित जुयादीगु दु ।
नेपाः पासा पुचः अमेरिकाय् नेपालं पिने नेवाःतय्सं गठन याःगु न्हापांगु नेवाः संस्था खः । थनिं स्वीन्यादँ न्ह्यः भाषासेवी राम मालाकारया नेतृत्वय् थ्व संस्था नीस्वंगु खः । न्हूम्ह नायः शान्ति श्रेष्ठ वय्कः हे राम मालाकारया म्ह्याय् खः । एनपीपीएया थीथी पदय् च्वनाः ताःई न्ह्यवंनिसें सक्रिय जुया च्वनादीम्ह वय्कलं आः नायःया रुपय् संस्थायात थप गति बीगु आशा यानातःगु दु । वय्कः अमेरिकाय् च्वंगु मेमेगु नं नेपाःमितय् संस्थाय् आवद्ध जुया च्वनादीगु दु ।
अमेरिकाया मेरिल्याण्डया गेथर्सवर्ग शहरय् जूगु समारोहय् अमेरिकास्थित नेपाली राजदूतावासया युगराज पाण्डे, तुलसी महर्जन लगायतया पाहांपिंसं शंखधर साख्वाःया किपाय् स्वां देछानादीगु खः । ज्याझ्वलय् ‘दबू’ ख्वाःपौ नं विमोचन जूगु खः ।
LEAVE YOUR COMMENTS