व्यक्तिं कयातःगु गुथिया जग्गा धमाधम बदर

येँ – व्यक्तिया नामय् दर्ता जुयाच्वने धुंकूगु सरकारी, सार्वजनिक व गुथिया जग्गात आः धमाधम सरकारं थःगु नामय् हयेगु शुरु याःगु दु । भूमि सुधार मन्त्रालयं आः तकया दुने सलंसः बिघा व्यक्तिया नामय् वनेधुकूगु जग्गा लित कायेगु ज्या यानाच्वंगु दु ।

सरकारं वालुवाटारया सरकारी जग्गा हड्पे याःपिंत कारवाही यायेगु लागिं मुद्दा चले यानाच्वंगु इलय् मेखे भूमिसुधार मन्त्रालयं व्यक्तिया नामय् वनाच्वंगु जग्गा लित कायेगु ज्या नं शुरु याना हःगु खः । आः तक सरकारं तराई लागाय् व्यक्तिया नामय् वनाच्वंगु २६४ बिघा जग्गा बदर यासें सरकारया नामय् हयेधुंकूगु दु । उकथं हे पहाडी लागाय् नं ९६ रोपनी जग्गा बदर यासें सरकारया नामय् हयेधुंकूगु दु । थ्व बाहेक मेगु सलंसः रोपनी जग्गा रोक्का यानातःगु दु । थुकिया बारे नं खँ क्वःजीवं याकनं हे बदर यानाः सरकारं दुकायेगु तयारी जुयाच्वंगु खँ मन्त्रालय स्रोतं धाःगु दु । रोक्का जुयाच्वंगु जग्गा बारे छानबिन जुयाच्वंगु दु ।

व्यक्तिया नामय् लानाच्वंगु सरकारी, सार्वजनिक व गुथिया जग्गा बारे छानबिन यायेगु लागिं सरकारं छगू जाँचबुझ आयोग नं गठन यानातःगु दु । तर थ्व आयोगयात सरकारया हे थीथी संस्थातय्सं ग्वाहालि मयाःगु खँ धाःगु दु । यदि सरकारया थीथी निकाय व पदाधिकारीतय्सं ग्वाहालि यात धाःसा थ्व आयोगं नं यक्वं जग्गा लुइके फइगु खँ धाःगु दु ।

मन्त्रालयं धाःसा फुक्क हे थासय् च्वंगु सार्वजनिक जग्गाया लगत कयाः सरकारयात बुझे यायेगु वा स्थानीय तह थःपिंसं हे उकियात थः मातहत हयेगु लागिं पत्राचार यायेधुंकूगु दु । अज्याःगु जग्गा गनं लुल धाःसा अन तुरुन्त हे सरकारया साइनबोर्ड तयाः सार्वजनिक जानकारी बीगु लागिं नं सरकारं निर्देशन बिउगु दु ।

थ्वहे झ्वलय् येँ महानगरपालिकां थःगु फुक्क हे वडाय् पौ छ्वयाः सार्वजनिक जग्गा फुक्क हे वडा मातहत हयेत निर्देशन बिउगु दुसा वडातय्सं नं अज्याःगु जग्गा मालाः मनपा दुने हयेगु ज्या न्ह्याकाच्वंगु दु ।

सम्बन्धित बुखँ

LEAVE YOUR COMMENTS