ने. सं. ११४६ सिल्लागा दशमी -

बोस्टनय् सक्वया सम्पदाया चित्रकला ब्वज्या

बोस्टन- बोस्टनय् सक्वया न्यागू ध्वाखा व नेपाःया थीथी सम्पदाया चित्रकला ब्वज्या जूगु दु । बोस्टनया गालाटिया फाइन आर्टय् ‘टु द गेट्स’ शीर्षकय् मय्जु निभा श्रेष्ठया एकल चित्रकला ब्वज्या वंगु नोवेम्भर ७ निसें न्ह्याःगु खः ।

थौंकन्हय् अमेरिकाया बोस्टन शहरय च्वनादीम्ह निभा श्रेष्ठ सक्वया हे म्ह्यायमचा खः । वय्कलं बोस्टन शहरया आर्ट ग्यालरीइ न्हापा नं थःगु एकल चित्रकला ब्वज्या यानाादीधुंकूगु दु । वय्कःया चित्र नेपाःया लिसें थीथी देय्या वास्तुकला पाखें प्रभावित जू ।

वय्कः २०७२ सालं नेपाः लिहां झाःबलय् येँ, यल, ख्वप नापं सक्वया सम्पदाक्षेत्र चाःहिलेधुंकाः थनया मौलिक व सांस्कृतिक वास्तुकलायात थःगु कलाकारिताय् ब्वयेगु मनसुवाः कथं सक्वया ध्वाखा लिसें थनया वास्तुकलाय् आधारित चित्र च्वयादीगु खः ।

बोस्टनय् जुयाच्वंगु ब्वज्याय् सक्वया न्यागू ध्वाखाःया तःपाःगु चित्र लिसें मेमेगु समपदाया यानाःझिंनिपाः चित्र ब्वयातःगु दु । वय्कलं थुगुसिया थःगु ब्वज्या सक्वयात देछासें न्ह्याकागु खँ धयादीगु दु ।

सक्व येँया उत्तर पूर्वय् च्वंगु नेवाःतय् बाहुल्यता दुगु ऐतिहासिक शहर खः । थन थःगु हे मौलिक कला संस्कृति व परम्परा दु । सक्व देशय् थीथी सांस्कृतिक ज्याखँया लिसें दुहां पिहां जुइगु निंतिं थीथी थासय् ध्वाखा दयेकातःगु दु । न्हापा च्यागू थासय् च्यागू ध्वाखा दुगु धयातःगु दुसां थौंकन्हय् थन न्यागू ध्वाखा खंकेफइ । थ्व न्यागु ध्वाखाःया थःथःगु हे परम्परागत सांस्कृतिक महत्व दु । सक्वया पुलांगु बसपार्क जुयाः वनेबलय् न्हापालाक वइगु ध्वाखाः भौ ध्वाखाः खः। सक्वया पिनि ब्याहा यानाः न्हापालाक भौमचा दुकायेबलय् थ्व भौ ध्वाखां हे दुत यंकेमाःगु परम्परा आतकं ल्यनाच्वंगु दनि । अथेहे मेगु ध्वाखा दक्षिणपाखे दुगु म्ह्यायमचा ध्वाखा खः । सक्वया म्ह्यायमचा बियाछ्वइबलय् थ्व ध्वाखां पितयंकेमाःगु परम्परा दु । अथेहे मेगु ध्वाखा द्यः ध्वाखा खः । उत्तरपाखे लाःगु थ्व ध्वाखां उग्रतारा बज्रयोगनीया जात्रा जुइबलय् द्यः कुहांबिज्याइगु व थहां बिज्याइबलय् थ्व हे ध्वाखां द्यः दुत हयेगु व लित यंकेगु याइ ।

मेगु छगू ध्वाखा सी ध्वाखा खः । थुकियात साखा महाद्यः ध्वाखाः नं धायेगु याः । थ्व सक्वया मू बजारय् लाः । सक्व देसय् सुं मनूया मृत्यु जुलधाःसा सिथं यंकिबलय् थ्व ध्वाखां पिने यंकेगु याइ । सक्वय् थौंकन्हय् दुगु मेगु छगू ध्वाखा सक्वं नारी खुसिइ वनेत छ्यलीगु ध्वाखा खः । थ्व ध्वाखा लिपा जक दयेकूगु खः ।

चित्रकार श्रेष्ठ थः नेवाः जूगु नातां नेवाः कला संस्कृति व सम्पदाया संरक्षण व प्रवद्र्धनया निंतिं थःम्ह सःगु, फुगु ज्या यानाः ग्वाहाली यायेगु लिसें अन्तर्राष्ट्रीयस्तरय् नेपाःया म्हसिका बीगु निंतिं थ्व ब्वज्या यानागु खँ कनादीगु दु ।

रजनी श्रेष्ठ