ने. सं. ११४४ कौलाथ्व षष्ठी -

देय् दबूया नीगुक्वःगु बुसादँ

येँ(नेपालभाषा टाइम्स)- नेवाः देय् दबूया २९ क्वःगु बुसादँ वंगु शुक्रवाः थनया छत्रपाति पार्टी प्यालेसय् छगू विशेष ज्याझ्वः यासें हन । ज्याझ्वलय् देय् दबूपाखें लःल्हाना वयाच्वंगू छगू छगू लख स्वंगू सिरपाः थीथी व्यक्ति व संघसंस्थायात लःल्हाःगु खः ।

देय् दबूया कार्यवाहक नायः चन्द्रलाल राजभण्डारीया सभापतित्वय् जूगु ज्याझ्वःया उलेज्या मूपाहां उपप्रधानमन्त्रीलिसें गृहमन्त्री नारायणकाजी श्रेष्ठं त्वाःदेवाय् मत च्याकाः यानादीगु खः ।

ज्याझ्वलय् छगू छगू लख तका दांया नारायणदेवी–तीर्थ समाज सेवा सिरपाः, नारायणदेवी–तीर्थ व्यवसायी प्रोत्साहन सिरपाः व गिरिधरलाल नेपालभाषा सेवा सिरपाः थीथी व्यक्ति व संस्थायात लःल्हाःगु खः । नारायणदेवी–तीर्थ समाज सेवा सिरपाः नेवाः न्ह्यलुवा डा. महेशमान श्रेष्ठ व नेवाः समाज भरतपुर (चितवन)यात लःल्हाःगु खः । अथे हे नारायणदेवी–तीर्थ व्यवसायी प्रोत्साहन सिरपाः नेपालमण्डल टेलिभिजन व गिरिधरलाल नेपालभाषा सेवा सिरपाः प्रा. प्रेमशान्ति तुलाधर व नेपाल लिपि गुथियात लःल्हाःगु खः ।

सिरपाः छनोट समितिया कजिलिसें देय् दबूया सल्लाहकार डा. पुष्पराज राजकर्णिकारं सिरपाः त्याकादीपिनिगु नां घोषणा यानादीगु ज्याझ्वलय् देय् दबूया छेँ दनेत विशेष ग्वाहालि यानादीम्ह दाता साहु पञ्चवीर सिंह तुलाधरयात बेताली चिकाः दोसल्ला न्ययेकाः हनेज्या याःगु खः ।

ज्याझ्वलय् नवासें मूपाहां गृहमन्त्री श्रेष्ठं सुना नं थःगु म्हसीका, संस्कृतिया बारे खँ ल्हायेबलय् हिनता मखसे गर्व महसुस याये फयेकेमाः धयादिल ।

देय् दबूया संरक्षक लिसें नेवाः न्ह्यलुवा मल्ल के. सुन्दरं दछि न्ह्यः घोषणा याःगु ‘झीगु भाय् झीसं ल्हाये’ नारायात ल्वःमंकूगु धासें वर्तमान नेतृत्वप्रति असन्तुष्टि प्वंकादिल । वय्कलं नेवाः देय् दबूया बुदिं हनेगु धइगु ह्याउँगु सिन्हः तीगु, क्वखा क्वखायेगु, सिरपाः लःल्हायेगु, सिरपाः लःल्हाना कायेगु व समय्बजि जक नयेगु खःला धासें थौं झीगु भाय् संगीन अवस्था लानाच्वंगु दु धयादिल ।

लिसें वय्कलं दबू छेँ दनेगु हे जक उद्देश्य खःसा झीगु भाय्, झीगु म्हसीका मंत धाःसा खां खां छेँ दनाः भौतिक संरचना जक मुंकाया अर्थ दइमखु धयादिल ।

ज्याझ्वलय् पाहांकथं झायादीपिं आदिवासी जनजाति उत्थान राष्ट्रिय प्रतिष्ठानया उपाध्यक्ष गोकुल घर्तीमगर, नेपाल आदिवासी जनजाति महासंघया वरिष्ठ उपाध्यक्ष बुद्ध घर्ती, डब्लुएनओया पुलांम्ह नायः सिजन श्रेष्ठ, पुलांम्ह मन्त्री राजेन्द्रप्रसाद श्रेष्ठ लगायतं भिंतुना न्वचु बियादीगु खः ।

देय् दबूया न्वकु रश्मिला प्रजापतिं लसकुस यानादीगु ज्याझ्वलय् लोककवि राजभाई जकःमिं चिनाखँ न्यंकादीगु खःसा पासा पुचः धरानं लाखे, कुमारि चर्या प्याखं नं न्ह्यब्वःगु खः ।