लुम्बिनीइ मंकाः प्रव्रज्या शिविर

येँ – शान्ति नायक भगवान गौतम बुद्धया जन्मस्थल लुम्बिनीइ छक्वलं १,११९ म्ह भिक्षुया मंकाः प्रव्रज्या जूगु दु । लुम्बिनीस्थित मायादेवी देगः परिसरय् धार्मिक अनुष्ठानपूर्वक सकसितं चीवर व शिलधारण याकुसे थाइल्याण्डं बिज्याःम्ह भिक्षु थावरं प्रव्रजित यानाबिज्याःगु खः ।

नेपाःया न्हापांम्ह महासंघनायक नापं ‘अरिय धम्मरक्खित नेपाल बुद्ध शासन वंशालंकारसिरी संघमहानयक अग्गमहापण्डित’ उपाधिपाखें विभूषित जुयाबिज्याःम्ह भिक्षु प्रज्ञानन्द महास्थविरया १२९ क्वःगु जन्मजयन्तीया लसताय् लाकाः उगु प्रव्रज्या ज्याझ्वः जूगु खः ।

लुम्बिनीइ न्याक्वःखुसी जूगु थुकथंया प्रव्रज्या शिविर वंगु शुक्रवाः जूगु खः । प्रव्रज्या शिविरय् विशेष ज्याझ्वःया दथुइ कुलपुत्रपिंत मंकाःकथ प्रव्रज्जित यायेगु ज्या जूगु ज्याझ्वःया छम्ह सहयोगी प्रविण शाक्यं कनादिल । उगु ज्याझ्वः थाइ दाता, थीथी विहार व नेपाल पर्यटन बोर्डया ग्वसालय् जूगु खः ।

नेपाःलिसें थाइल्याण्ड, भारत, चीन लगायत थीथी देशं बिज्याःपिं भिक्षुपिंसं बुद्धया जीवनी, लुम्बिनीया महत्व, बौद्ध धर्म, बुद्ध शिक्षा बारे जानकारी बिउगु खः । प्रव्रज्या शिविरय् सहभागि भिक्षु कोनं थुकथं जुइगु विशेष ज्याझ्वः व प्रव्रज्या शिविरय् कुलपुत्रपिंत स्थायी व अल्पकालीन रुपं भिक्षु यायेगु याना वयाच्वनागु धयाबिज्याःगु दु ।

बुद्ध धर्मया मान्यता कथं शाक्यमुनि समुदायय् छन्हुया निंतिं जूसां नं भिक्षु जुइमाः धइगु मान्यता कथं थुकथंया प्रव्रज्या शिविर यायेगु याना वयाच्वनागु भिक्षु कोनं कनाबिज्यात ।नीस्वन्हुयकंया शिविरय् अन्तर्गत लुम्बिनीइ हे भिक्षुपिंत मंकाः भिक्षाटन याकेगु ज्या नं जूगु खःसा थ्वयां लिपा बुटवल, पाल्प लगायतया थीथी सहरय् नं भिक्षाटनया ज्याझ्वः तयातःगु दु । वइगु फागुन २० गते शान्तिदीप प्रज्वलन यानाः चैत ३ गते थुगु शिविर समापन याइगु ज्याझ्वः दु ।

 

सम्बन्धित बुखँ

LEAVE YOUR COMMENTS