समाजसेवी दिलबहादुर मानन्धर मंत

येँ (नेपालभाषा टाइम्स)- नेपालभाषा टाइम्सया ग्वाहालिमि वरिष्ठ समाजसेवी दिलबहादुर मानन्धर मंत । वय्कः थौं सुथय् ८६ दँया वैंशय् मनमोहन अस्पतालय् वासः याकुयाकुं मदुगु खः । वय्कःया लछि न्ह्यः जक प्रोस्टेट ल्वय् सम्बन्धी अपरेशन जूगु खः । अपरेशन लिपा छेँय् लिहां वयेधुंकूम्ह खःसां छुं न्हि न्ह्यव निसें विरामी जुयाः वासः याकाच्वनादीम्ह खः ।
वय्कःया अन्त्यष्टी थौं न्हिनय् साढे बाह्र बजे टेकुइ याइगु जूगु दु । वय्कःया स्वम्ह काय व छम्ह म्ह्याय् दी ।
मदुम्ह मानन्धर येँ महानगरपालिका १३ वडाया पुलांम्ह वडा सदस्य खः । अथेहे १३ वडाया थीथी संस्थातय् मंकाः संगठन जुयाच्वंगु हाम्रो समाजया नायः खः । वय्कः थः जहानया नामय् चायेकातःगु गणेशदेवी फाउण्डेशन पाखें नेपालभाषा ख्यलय् योगदान याना वयाच्वंपिंत हनेगु ज्या नं याना वयाच्वनादीम्ह खः ।