खुशीबही स्वागतद्वारया उलेज्या

येँ – काठमाडौँ महानगरपालिका वडा नं १३ टंकेश्वर खुशीबहिलीई निर्माण जूगु खुशीबही स्वागतद्वारया आइतवाः उलेज्या जुल । बागमती प्रदेशया माननीय राजेश शाक्यया सांसद पूर्वाधार विकास कार्यक्रम अन्तर्गत नदी संगम महाविहार सर्वसंघ, खुशीबहीया सहकार्यय् उगु ध्वाखा निर्माण जूगु खः । उलेज्या सांसद शाक्य व १३ नं वडाया वडाध्यक्ष धु्रबनारायण मानन्धरं मंकाः कथं यानादिउगु खः ।

उगु हे ज्याझ्वलय् खुशीबहीया ऐतिहासिक व धार्मिक महत्व न्ह्यःब्वयेगु ताःतुना दयेकातःगु ‘खुशीबही’ वृत्तचित्रया नं लोकार्पण जूगु खः । खुशीबही स्वागतद्वार निर्माण उपभोक्ता समितिया नायः महेन्द्र रत्न शाक्यं उगु वृत्तचित्र तयार यानादिउगु खः ।

ज्याझ्वलय् न्ववासें सांसद शाक्यं स्वनिगःया सम्पदा संरक्षण यायेगु थःपिनि मू आज्जु जूगुु धासें येँया १८ गू बहाः व १६ गू बहीया बिस्कं बिस्कं सर्किट दयेकाः प्रवद्र्धन यायेमाःगु आवश्यकतायात ल्ह्वना वयाच्वनागु खँ कनादिल । वडाध्यक्ष मानन्धरं सांसद पूर्वाधार विकास कोषपाखें १३ नं वडाय् आपालं विकास निर्माणया ज्या न्ह्याकेफुगु लसताया खँ खः धासें भिंगु ज्या यायेबलय् पंगः वःसां नं लिमचिलागु अनुभव कनादिल ।

खुशीबही स्वागतद्वार निर्माण उपभोक्ता समितिया छ्यान्जे रविन्द्र शाक्यं खुशीबहीया नां व ऐतिहासिकतायात सदाकालं ल्यंकातयेया लागि स्वागतद्वार दयेकेमाःगु खँ कनादिल । नापं वयकलं स्वागतद्वार निर्माणया ल्याःचाः नं न्ह्यःब्वयादीगु खः ।

ज्याझ्वया दथुइ १५ गू मिनेट ताःहाकगु खुशीबही वृत्तचित्र क्यनेज्या नं जूगु खः ।