कुमारी छेँया त्वरं पुनर्स्थापना (भिडियाे रिपाेर्ट)

येँ (नेपालभाषा टाइम्स)/ बसन्तपुली च्वंगु कुमारी छेँय् नं खुयायंकूगु छगू त्वरं शुक्रवाः पुनस्र्थापना याःगु दु । कुमारी छेँया मूलुखाया खवय् लाःगु तिकिझ्याःया च्वय्च्वंगु त्वरं पुनस्र्थापना याःगु खः । थुगु त्वरं तयातःगु छाउनीस्थित राष्ट्रिय संगंहालयं तःजिक लसकुस यानाः त्वरंयात कुमारी छेँय् थ्यंकःहःगु खः । त्वरं काःवनेगु निंतिं येँ महानगरपालिकाया उपमेयर सुनिता डंगोल, येँ महानगरपालिका २३ वडाया वडाअध्यक्ष मचाराजा महर्जन, सम्पदा अभियन्ता गणपति लाल श्रेष्ठलिसें यक्व सम्पदाप्रेमीत बाजंसहित छाउनी थ्यंगु खः । थ्व त्वरंयात छाउनी म्युजिम निसें बाजागाजा सहित दुलिइ तयाः कुमारी छेँय् हःगु खः । कुमारी छेँय् थ्यंकाः अन तयातःगु न्हूगु त्वरं लिकयाः पुलांगु त्वरं पुनस्र्थापना याःगु खः । अनं लिकाःगु न्हूगु त्वरं आः गुथि संस्थानया संरक्षणय् बियागु खँ येँ मनपा २३ वडाया अध्यक्ष मचाराजा महर्जनं कनादीगु दु ।

नीन्यादँति न्ह्यः थ्व त्वरं लिसें कुमारी छेँया क्वय्या तँया तिकिझ्याःया फुक्क त्वरं खुयायंकूगु खः । थथे खुयायंकूगु त्वरं मध्ये थुगु त्वरंयात बेलायतय् च्वंगु बाराकाटा म्युजियमय् तयातःगु लुइकूगु खः । बेलायतय् थ्व त्वरं लुइधुंकाः २०७८ चैत ४ गते म्युजियम थ्व त्वरं लिसें मञ्जुश्री नकमहाविहारया दाताया मूर्ति बेलायतस्थित नेपाली दूतावासयात लःल्हाःगु खः । अनं थ्व त्वरं लित हयाः येँया छाउनीस्थित राष्ट्रिय संग्रहालयय् तयातःगु खः । त्वरं लित हयेगु निंतिं सम्पदा अभियन्तात गणपतिलाल श्रेष्ठ, संजयराज शर्मापिंसं पहल यानादीगु खः । थ्व त्वरं छगू लुइकूसां उबलय् खुयायंकूगु मेगु त्वरं गन दु धयागु आःतक नं सीमदुनि ।

येँ महानगरपालिका २३ वडापाखें संयोजन व व्यवस्थापनय् छाउनी म्युजियमय् तयातःगु त्वरं लित हयाः कुमारी छेँय् पुनस्र्थापना याःगु खः । झी पुर्खातय्सं सिर्जना यानाथकूगु सम्पदात असुरक्षित जुल धकाः संग्रहालयय् तयातये मजिउ धासें येँ महानगरपालिकाया उपमेयर सुनिता डंगोलं थ्व त्वरं पुनस्र्थापना यायेत पहल यानादीगु खः ।

त्वरं लित हयाहःबलय् उपमेयर सुनिता डंगोललिसें येँ मनपा २३ वडाया अध्यक्ष मचाराजा महर्जनपिंसं हस्तान्तरण यानाकयागु भ्वँतय् सही यानाः कयाहःगु खः । राष्ट्रिय संग्रहालयया प्रमुखं उपमेयर डंगोलयात थुगु त्वरं लःल्हानादीगु खः । त्वरं लःल्हाना कायेधुंकाः छाउनी, ताहचः, भिंद्यःत्वाः, मरु जुयाः बसन्तपुलीइ थ्यंकेहःगु खः । कुमारी छेँ न्ह्यःने थ्यंकाः विधिवत पुजा यानाः त्वरं पुनस्र्थापना याःगु खः ।

नेपालभाषा टाइम्स

च्वमिया मेमेगु

• बोस्टनय् सक्वया सम्पदाया चित्रकला ब्वज्या
• एनपीपीएया नायः पदय् शान्ति श्रेष्ठ
• समाजसेवी दिलबहादुर मानन्धर मंत
• शंखधरया लुँ व लोककल्याण
• राष्ट्रपतिपाखें संघीय समाजवादी पार्टीलिसे सहलह