सीमाय् भारतीय प्रहरी ज्वन
कपिलवस्तु÷कूटनीतिक नियम हाजांचायाः नेपाः दुहां वःपिं भारतीय प्रहरीया सबइन्स्पेक्टरसहित स्वम्ह भारतीय प्रहरीयात म्हीग कृष्णनगरय् ज्वंगु दु । ज्वना तःपिं भारतया बलरामपुर जिल्ला पचपेडवा थानाया सबइन्स्पेक्टर डिएस चतुर्वेदी, कन्स्टेबल नासिर हुसेन व कन्स्टेबल कोमल खः ।
उपिं कृष्णनगर भन्सार सीमा नाका जुयाः नेपाः दुहां वःगुखः । म्हिगः न्हिनय् ४ बजे कृष्णनगर बजारं नेपाल प्रहरी व सशस्त्र प्रहरीया मंकाः पुचलं उमित ल्वाभः सहित ज्वंगु खँ सशस्त्र प्रहरी उपरीक्षक भगवान मल्लं कनादिल । नेपाली सुरक्षाकर्मीया नियन्त्रणय् तयाःलि उमित म्हीग हे बहनी भारतीय प्रहरी अधिकारीया जिम्माय् त्वःतूगु खः ।
भारतीय सुरक्षाकर्मी ल्वाभः सहित कृष्णनगर सीमा नाकां दुहां वलं नं सीमा नाकाय् खटे जुयाच्वंपिं सुरक्षाकर्मीयात जानकारी तक हे मदइगु जूगुलिं सीमा क्षेत्रया सुरक्षा अवस्था तसकं फ्यासुगु खँ कृष्णनगरया सर्वसाधारणं कंगु दु । – रासस
LEAVE YOUR COMMENTS