३९ म्हेसित बाँसुरी प्रशिक्षण

ख्वप (नेपालभाषा टाइम्स)- ख्वपया चित्तपोलय् लाःगु सिमल्टार बाँसुरी खलःपाखें ३९ म्हेसिन बाँसुरी पुइगु सयेकूगु दु । सूर्यविनायक नगरपालिका वडा नं. १० य् लाःगु थुगु बाँसुरी खलकं कला, संस्कृतिया रक्षा यायेगु ताः तयाः स्थानीय ३९ म्ह नेवाःतय्त बाँसुरीया प्रशिक्षण बिउगु खः । प्रशिक्षणय् झिंछदँ निसें ५३ दँ तक दुपिं सहभागी जूगु खँ धाःगु दु ।

बाँसुरी प्रशिक्षण कयादीपिंत छगू ज्याझ्वःया दथुइ सूर्यविनायक नगरपालिकाया प्रमुख बासुदेव थापा, वडा नं. १०या अध्यक्ष शिवराम राउतं प्रमाणपत्र लःल्हानादीगु खः ।

ज्याझ्वलय् न्ववानादिसें सूर्यविनायक नगरपालिकाया प्रमुख थापां थःगु कला, संस्कृति ल्वःमंकल धाःसा झीगु अस्तित्व हे मदयावनी धासें कला संस्कृतिया विकास व विस्तारय् नगरपालिकां माःगु पलाः न्ह्याकी धयादिल । अथेहे वडाध्यक्ष शिवराम राउतं वडाया लक्ष्य कला, संस्कृति, परम्पराया संरक्षण व सम्वद्र्धन यायेगु नं जूगुलिं वडापाखें माःगु ग्वाहालि जुइगु खँ धयादिल ।

बाँसुरी सयेकूपिंत धर्म मुनिकारं प्रशिक्षण बियादीगु खः । वय्कलं थःपिंसं प्रशिक्षण बियागु थ्व १२० औं थाय् जूगु खँ धयादीगु दु । ज्याझ्वलय् वय्कःयात नं सम्मान याःगु खः ।