ने. सं. ११४६ अनलाथ्व पञ्चमी -

जसपाया कारणं मध्यावधि जुइफु

येँ – जनता समाजवादी पार्टीइ ब्वलंगु कचवंया कारणं यानाः देश हानं मध्यावधि चुनावपाखे वनीगु सम्भावना तीव्र जुया वःगु दु । संविधानया धारा ७६ ९३० कथं प्रधानमन्त्री नियुक्त जुयादीम्ह केपी शर्मा ओलीं आः विश्वासया मत काइबलय् ओलीयात भोट मबीगु धकाः जसपाया निगुलिं गुटया नेतातय्सं मंकाः विज्ञप्ति जारी याःगु दु । यदि प्रम ओलीयात विश्वासया मत प्राप्त मजुल धाःसा संसद भंग यानाः चुनावय् वनेगु बारे मेगु विकल्प मदइगु खँ धयाहःगु दु ।

प्रधानमन्त्री ओलीयात समर्थन यायेगु लाकि मयायेगु धइगु खँय् जसपा दुने तःधंगु कचवं ब्वलंगु जुयाः पार्टीपाखें ओलीयात समर्थन मयायेगु बरु थःपिनिगु हे नेतृत्वय् सरकार गठन यायेगु धकाः निर्णय याःगु खः । यदि जसपाया नेतृत्वय् सरकार गठन यायेगु वातावरण ब्वलन धाःसा अज्याःगु अवस्थाय् मध्यावधि चुनावया सम्भावना तरे जुइफुगु खँ धाःगु दु ।

आः ओलीं विश्वासया मत फ्वनीबलय् यदि जसपाखें भोट मबिल धाःसा ओलीया पक्षय् बहुमत दइ मखु । वयां लिपा थ्व सरकार नं भंग यानाः संविधानया मेगु धारा कथं सरकार गठन याये माली । संविधानया धारा ७६ ९५० य् संसदय् बहुमत खाके फुम्ह न्ह्याम्ह जूसां सांसदया नेतृत्वय् सरकार गठन याये फइगु व्यवस्था यानातःगु दु । उगु धाराय् प्रवेश जुइबलय् यदि जसपाया सुं नेताया पक्षय् बहुमत सांसदया समर्थन दत धाःसा मेगु सरकार गठन जुइगु सम्भावना दु ।

सूत्रतय्सं धाः कथं जसपा नेता महन्थ ठाकुरया नेतृत्वय् सरकार गठन यायेगु प्रस्ताव न्हापा प्रम ओलीं समेत तःगु खः । ठाकुरया पक्षय् स्वयम् जसपा दुने नं सहमति जुइगु सम्भावना दु । एमालेया माधव नेपाल पक्ष नं ठाकुरप्रति उदार दु । यदि वातावरण निर्माण जुल धाःसा ठाकुरया नेतृत्वय् सरकार गठन जुइफु । छुं जुयाः उगु सम्भावना नं निर्माण मजुल धाःसा वयां लिपा मध्यावधि चुनावय् वनेगु बाहेक विकल्प मदयेफु ।

तर आः हे मध्यावधि चुनावय् वनेगु धकाः निर्णय जूसां कोरोना महामारीया कारणं चुनाव याये फइगु अवस्था धाःसा मदु । प्रम ओलीं वंगु पुसं संसद भंग याःबलय् बैशाखं चुनाव यायेगु धकाः मिति घोषणा याःगु खः । तर वैशाख महिनाय् देशय् निषेधाज्ञा लागू यायेमाःगु अवस्था ब्वलन ।

दलया नेता ल्यज्याय् विवाद
प्रधानमन्त्री केपी ओलीयात विश्वासया मत बीगु मखु धइगु खँय् जसपा नेतात महन्थ ठाकुर व उपेन्द्र यादव दथुइ सहमति जूसां पार्टीया संसदीय दलया नेता सु जुइगु धइगु खँय् धाःसा मतभेद ब्वलंगु दु । पार्टी अध्यक्ष ठाकुरं थःपिनि संसदीय दलया नेता राजेन्द्र महतो खः धकाः संसद सचिवालयय् पौ च्वया छ्वःगु दुसा मेम्ह अध्यक्ष उपेन्द्र यादवं दलया बैठकं निर्णय मयासे महतोयात नेता धाःगु जूगुलिं उकियात मान्यता बी मते धकाः संसद सचिवालयय् मेगु पौ छ्वःगु दु ।

यादवया पती धयातः कथं आः तक जसपा संसदीय दलया विधान तकं तयार मजूनिगु कारणं दलया निर्णय बिना सुयातं नं नेता ल्यये फइ मखु । छगू हे पार्टीया निम्ह नेताया अलग अलग पौ दर्ता जूगु कारणं संसद सचिवालय नं अन्यौलय् लाःगु खँ धाःगु दु ।