बादलया सुरक्षा सल्लाहकार राई ज्वन

येँ (नेपालभाषा टाइम्स)- नेपाःमियात भूटानी शरणार्थी दयेकाः अमेरिकाय् छ्वयेगु धासें करोडौं तका म्हःगु द्वपनय् तत्कालीन गृहमन्त्री रामबहादुर थापा ‘बादल’ या सुरक्षा सल्लाहकार इन्द्रजित राईयात म्हिगः प्रहरीं ज्वंगु दुसा वया काय निरज राई विरुद्ध नं पक्राउ पुर्जी जारी याःगु दु ।

प्रहरीं इन्द्रजितयात मंगलवाः छेँय् वनाः ज्वंगु खःसा निरजयात नं ज्वनेगु कुतः याःगु खः । तर निरज छेँय् मदुगुलिं ज्वने धाःसा मफुत । नक्कली शरणार्थी दयेकाः ध्यबा म्हयाच्वंगु गिरोहया नाइके केशव दुलाल, सानु भण्डारी, सागर थुलुङ राई, टंक गुरुङ व सन्देश शर्मा पोखरेलयात प्रहरीं ज्वनेधुंकाः उमिसं बिउगु बयानया आधारय् राई अबु–काय् बारे नं अनुसन्धान न्ह्याकूगु खः ।

प्रहरीं राई अबु–काय्बारे अनुसन्धान न्ह्यायेवं कायम्ह निरज देय् त्वःताः बिसिउँ वंगु अनुमान याःगु दु । थापा गृहमन्त्री जूगु इलय् २०७४ फागुनंनिसें २०७८ असार तक राई वय्कःया सुरक्षा सल्लाहकारय् नियुक्त जूगु खः । उगु इलय् राईं भूटानी शरणार्थी समस्या ज्यंकेगु नितिं स्थायी कथं लँपु मालेगु धासें गृह मन्त्रालयं नीतिगत रुपं मिले मजूगु निर्णय याकूगु व नक्कली शरणार्थी दयेकेत करोडौं तका दां म्हयेगु ज्या याःगु खः ।

उगु गिरोहं ८७५ म्ह मनूतय्त नक्कली शरणार्थी दयेकेत भ्वं दयेकूगु खः । गिरोहया दुजःतय्सं बयान बीगु झ्वलय् तत्कालीन गृहमन्त्री थापाया काय प्रतिक थापा व निरजं ध्यबा म्हयेगु नितिं मध्यस्थकर्ता कथं ज्या याःगु खः ।

प्रहरीं याःगु प्रारम्भिक अनुसन्धानय् गिरोह चले यायेगु व ध्यबा म्हयेगु ज्याय् राईया तप्यंक ल्हाः दुगु प्रमाण लूगु दु । राईं जक गिरोेहपाखें ५ करोड स्वयां अप्वः दां काःगु खनेदुगु खँ नं प्रहरीं धाःगु दु ।