आप्रवासीतय्त अमेरिकाय् वयेमबीगु ट्रम्पया घोषणा

येँ – अमेरिकी राष्ट्रपति डोनाल्ड ट्रम्पं अस्थायी रुपं अमेरिकाय् आप्रवासीतय्त वयेमबीगु घोषणा यानादीगु दु ।

राष्ट्रपति ट्रम्पं अमेरिकी नागरिकतय् रोजगारीया सुनिश्चितता यायेगु निंतिं आप्रवासीतय्त वयेमबीगु कार्यकारी निर्देशनय् हस्ताक्षर यायेगु घोषणा यानादीगु खः । कोरोना भाइरसया कारणं अमेरिकाय् आर्थिक समस्या वयाच्वंगु इलय् ट्रम्पया थज्याःगु घोषणा सार्वजनिक जूगु खः ।

ट्रम्पं थःगु ट्वीट मार्फत धयादीगु दु, ‘महान अ‍ेमेरिकी नागरिकया रोजगारीया सुनिश्चतता यायेगु निंतिं अस्थायी रुपं आप्रवासीतय्त अमेरिकाय् वयेमबीगु कार्यकारी निर्देशनय् हस्ताक्षर यायेगु जुइ ।’

थज्याःगु घोषणां गज्याःगु आप्रावासी ज्याझ्वलय् लिच्वः लाकीगु खः धकाः प्रष्ट याःगु मदुनी । ह्वाइट हाउसं नं राष्ट्रपति ट्रम्पया घोषणाया बारे थप जानकारी बिउगु मदुनी ।