ने. सं. ११४६ बछलागा चौथी -

भारतया हिमाञ्चल प्रदेशय् चलः वनाः सीपिनिगु ल्याः १३ थ्यन

एजेन्सी- भारतया हिमांचल प्रदेशया कित्रौर जिल्लाय् बुधवाः न्हिनय् स्थानीय ईकथं १२ निसें १२ः३० य् वंगु चलखय् लानाः सीपिनिगु ल्याः १३ म्ह थ्यंगु दु । जिल्लाया अधिकारीतय्सं बिउगु जानकारीकथं आतक १३ म्ह सीगु व निम्ह गम्भीर घाःपाः जूगु दु । अथे हे मेपि १३ म्ह नं घाःपाः जूगु दु । भारतीय सञ्चार माध्यमतय्सं बिउगु समचारकथं चलः वनाः बस, ट्रक व मेमेगु सवारी साधन नं ल्हाःगु दु ।

हिमांचल प्रदेशया मुख्यमन्त्री जयराम ठाकुरं बिउगु जानकारीकथं चलः वनाः ५० निसें ६० म्ह मनूत ल्हानाच्वंगु व उमित लिकायेत कुतः जुयाच्वंगु दु । हिमाञ्चल इमर्जेन्सी अपरेसन सेन्टरं धाःसा २५ निसें ३० म्ह मनूत ल्हानाच्वंगु धाःगु दु । सरकारी अधिकारीतय्सं अझ नं ल्वहं व चा कुतुं वयाच्वंगु मदिउगुलिं उद्धार यायेत थाकुयाच्वंगु धाःगु दु ।