ने. सं. ११४३ ञलाथ्व चतुर्दशी -

पाकिस्तानय् हिन्दू दयेकेत स्वीकृति

एजेन्सी – पाकिस्तानया राजधानी इस्लामाबादय् दये कीगु हिन्दू देगःयात कयाः राजधानी विकास प्राधिकरण (सिडीएं) स्वीकृति बिउगु दु । पाकिस्तानया अल्पसंख्यक हिन्दू समुदाययात कृष्णया देगः दनेत व सीम्ह च्याकेगु निंतिं दिप दयेकेत स्वीकृति बिउगु खः । इस्लामावादय्द येकेत्यंगु थ्व न्हापांगु हिन्दी देगः खः ।

पाकिस्तानया सत्तारुढ तहरीक ए इंसाफ (पीटीआई) पार्टीया अल्पसंख्यक समुदाया सांसदतय्सं शहरय् न्हापांगु हिन्दू देगः दनेत बिउगु स्वीकृतियात छगू महत्वपूर्ण पलाः धासें थुकिया स्वागत याःगु दु । पाकिस्तानया पुलाम्ह प्रधानमन्त्री नवाज शरीफया सरकारं सन् २०१७ य् पाकिस्तानया हिन्दू समुदायायात थ्व जग्गा बिउगु खः । शरीफ सरकारं बिउगु जग्गाय् कृष्ण देगः दनेगु खँ उबलय् हे हिन्दूतय्सं धाःगु खः ।

तर थ्व देगः दनेगु खँयात कयाः पाकिस्तानया कट्टर मुस्मां धार्मिक संस्थातय्सं धाःसा विरोध यानाच्वंगु दु । लाहौरया जामिया अशर्फिया मदरसाया
मुफ्ती मोहम्मद जकारियां थ्व देगः विरुद्ध फतवा हे जारी यानातःगु दु । फतवाय् धयातःकथं इस्लाम धर्म कथं अल्पसंख्यकतय्त न्हापा हे दयाच्वंगु पुजास्थलया स्यंल्ह्वं ज्या जक याकेदइ, तर न्हूगु हे थाय् दकेत अनुमति बियातःगु मदु ।

देगः दनेत्यंगु विरुद्ध इस्लामावाद हाइकोर्टय् स्वंगू रिट दायर याःगु खः । तर इस्लामावाद हाइकार्टं थ्व रिटयात खारेज यानाबी धुंकूगु दु ।