न्हापांगु विश्वयुद्ध अन्त्य जूगु दिं लुमंकल

फ्रान्सय् न्हापांगु विश्वयुद्ध अन्त्य जूगु न्हिया लुमन्तिइ विशेष ज्याझ्वः जुइगुु दु । उगु ज्याझ्वलय् अमेरिकी राष्ट्रपति डोनाल्ड ट्रम्पं नं ब्वति काइगु जूगु दु । विश्वया करिब खुगू दर्जन शक्तिशाली नेतातय्सं नं ब्वति काइगु उगु ज्याझ्वः स्वयां न्ह्यः फ्रान्सया राष्ट्रपति इम्यानुएल म्याक्रो व जर्मनीया चान्सलर एन्जेला मर्केलं मैत्रीपूर्ण व मेलमिलापपूर्ण व्यवहार क्यँसें न्हापांगु विश्वयुद्ध अन्त्य जूगु न्हियात लुमंकूगु दु ।

जर्मनीया चान्सलर मर्केल न्हापांगु विश्वयुद्ध अन्त्य जूगु सम्झौताय् ल्हाःचिं तःगु थासय् थ्यंकः वंगु दु । फ्रान्सया कम्पेनिया धइगु सहरया लिक्कसं लाःगु छगू जंगलय् न्हापांगु विश्वयुद्ध अन्त्य जूगु सम्झौताय् ल्हाःचिं तःगु खः । उगु जंगलय् थ्यंकःवंम्ह मर्केल निक्वःगु विश्वयुद्ध लिपाया न्हापांम्ह जर्मन राजनीतिज्ञ नं खः ।

सन् १९१४ जुलाई २८ कन्हु शुरु जूगु न्हापांगु विश्वयुद्ध प्यदँतक न्ह्यानाः सन् १९१८ नोवेम्बर ११ कुन्हु अन्त्य जूगु खः । न्हापांगु विश्वयुद्ध अन्त्यया सम्झौता छगः रेलय् जूगु खः । म्याक्रों व मर्केलं नं उकिया लुमन्तिकथं प्रतिकात्मक रेलय् च्वनाः स्मृति सफुतिइ ल्हाःचिं तयाः उगु दिंयात लुमंकूगु खः । उगु इलय् निम्हं राजनेतां फ्रान्स व जर्मनी दथुइ मेलमिलाप पिज्वइकथंया छगू ल्वहंपौ नं अनावरण याःगु खः ।

मेखे अमेरिकी राष्ट्रपति ट्रम्प व फ्रान्सया राष्ट्रपति म्याक्रों दथुइ युरोपेली देय्या प्रतिरक्षा सम्बन्धी विषययात कयाः जूगु विवादया दथुइ ट्रम्प फ्रान्स वनीगु जुइवं थुकियात महत्वपूर्ण घटनाया रुपय् काःगु दु । उखे न्हापांगु विश्वयुद्धया झ्वलय् सीपिं अज्ञात सैनिकतय् सीगाः तयातःगु थासय् जुइगु मुख्य ज्याझ्वःया नेतृत्व फ्रान्सया राष्ट्रपति म्याक्रों याइगु जूगु दु ।

सम्बन्धित बुखँ

LEAVE YOUR COMMENTS