ने. सं. ११४४ कौलाथ्व तृतीया -

सेवा सुविधा अस्वीकार

नेपालय् पूर्व विशिष्ट व्यक्तिपिंत सेवा सुविधा बीगु विषयय् व्यापक चर्चा व बहस जुयाच्वंगु दु । मेमेगु विकासशील देशय् पूर्व विशिष्ट पदाधिकारीतय्त सत्ताय् च्वनाच्वंगु इलय् बाहेकं सत्तां पिहां वनेधुंकाः अज्याःगु छुं नं सेवा सुविधा बीमखु । विकासशील देशय् जक मखु, विकासोन्मुख व आर्थिक संकट जुयाच्वंगु देशय् नं उकथं सेवा सुविधा बीगु उलि चलन मदु ।

अले गुलिसिनं स्वीकार नं याइमखु । थुकिया छगू लिपांगु उदाहरण खः उरुग्वे अले अनया पुलांम्ह राष्ट्रपति जोसे मुजिका । मुजिका राष्ट्रपति पद त्वःते धुंकाः नं सन् २०१५ तक उरुग्वेया सांसद जुया वयाच्वंम्ह खः । ८३ दँ दयेधुंकूम्ह मुजिकां थःगु ताःहाकःया राजनीतिक यात्रां तसकं त्यानुइ धुंकूगु धासें हालय् जक सांसद पदं नं राजीनामा बिउगु खः ।

सांसद पदं राजीनमा बिउसां मुजिकां थःगु दिमाग व क्षमतां ज्याये फत्तले देय्या एकता व विचारया युद्धपाखें धाःसा राजीनामा मबीगु स्पष्ट याःगु दु । तसकं सादा जीवन व्यतित याना वयाच्वंम्ह मुजिकां थः राष्ट्रपति जुयाच्वंगु इलय् नं सरकारी निवासय् च्वने अस्वीकार याना वयाचवंगु खः ।

मुजिकां सरकारी सेवा सुविधा अस्वीकार याःगु जक मखसे राष्ट्रपति जुयाच्वंगु इलय् राजधानी स्वयां तसकं तापाकःगु क्षेत्रय् च्वंगु छगू र्फाम हाउसय् च्वना वयाच्वंगु खः । पूर्व विद्रोही नेता तकं जुयाच्वंम्ह मुजिकाः थः पदय् दुगु इलय् अप्वःथें पारिश्रमिक दान यानादीगु खः । १९७० लय् विद्रोहया द्वपनय् ज्वंम्ह वयात ९०या दशकय् रिहा याःगु खः ।