ने. सं. ११४३ चौलाथ्व सप्तमी -

युक्रेनय् अक्रमण यात धाःसा रुसयात प्रतिबन्ध तयेगु ख्याच्वः

एजेन्सी- युक्रेनय् रुसं आक्रमण यायेफुगु खँयात ध्यानय् तयाः अमेरिकी विदेशमन्त्री एन्टनी ब्लिंकन बुधवाः युक्रेनय् वंगु दु । अमेरिकी विदेशमन्त्री ब्लिंकनं शुक्रवाः जेनेभाय् रुसी समकक्षी सर्गेई लेभरावलिसे नापलायेत्यंगु दु । थ्व झ्वलय् अमेरिकां रुसयात यदी युक्रेनया तनाव म्हो मयात धाःसा आर्थिक रुपं क्षति फयेमालीगु ख्याच्वः बीफुगु खँ धाःगु दु ।

मेखे रुसं धाःसां थःपिनि युक्रेनय् आक्रमण यायेगु छुं योजना मदु धयाच्वंगु दु । रुसं छगू लाखं मल्याक सैनिक युक्रेनया सीमाय् तैनाथ यानातःगु दु ।

ह्वाइट हाउसं धाःसा रुसं युक्रेनया तःधंगु ल्याखय् सेना तैनाथ याःगु व छुं नं इलय् युक्रेनय् आक्रमण यायेफुगु धाःगुदु । ह्वाइट हाउसया प्रवक्ता जेन साकीं बुधवाः युक्रेनया अवस्था तसकं खतरनाक दुगु खँ धयादीगु खः ।
साकिं धाःगु दु, ‘जिमित ताःकथं स्थिति तसकं खतरनाक अवस्थाय् दु । हालात गुगुं नं इलय् रुसं युक्रेनय् आक्रमण यायेफुगु अवस्थाय् थ्यनेधुंकूगु दु ।’

साकिं विदेशमन्त्री ब्लिंकनं रुसी समकक्षीलिसे नापलायेगु झ्वलय् कुटनीतिक माध्यमं समस्या ज्यंकेत इनाप याइगु खँ धासें आः रुसया राष्ट्रपति भ्लादिमिर पुटिन व रुसी नागरिकतय्सं आर्थिक प्रतिबन्ध चाहे जुयागु खः कि मखु धयागु क्वःछिइमाः धयादीगु खः ।
मेखे नेटों नं यदि रुसं युक्रेनविरुद्ध कारवाही यात धाःसा उकिया मू पुलेमालीगु ख्याच्वः बिउगु दु । नेटोया महासचिव जेन्स स्टोल्टनबर्गं छगू पत्रकार सम्मेलनय् न्ववासें नेटों युक्रेनया साथ बीगु व वयागु आत्मरक्ष यायेगु हकया समर्थन याइ धाःगु खः ।

वय्कलं नं रुसं आक्रमण यात धाःसा आर्थिक व राजनीतिक प्रतिबन्ध फयेमालीगु ख्याच्वः बिउगु खः । लिसें वय्कलं थःपिं रुस लिसे वार्ता चाहे जुयागु व रुसया सुरक्षा चिन्तायात सम्बोधन याये चाहे जुयागु खँ धयादीगु दु ।

थुगु पत्रकार सम्मेलनय् दुम्ह जर्मनया चान्सलर ओल्फ शोल्जं नं रुसं सीमाय् तनाव म्हो यायेगु कुतः यायेमाः धयादीगु खः ।
मेखे युक्रेनया रक्षामन्त्री ओलेक्सी रेजनिकोफं पश्चिमा देय्तय्त रुसयात तुरुन्त प्रतिबन्ध तयेत इनाप याःगु दु । रुसं आक्रमण यात धाःसा थ्व तसकं कठीन समस्या जुइफुगु धासें रक्षा मन्त्री रेजनिकोफं रुसयात तुरुन्त प्रतिबन्ध तयेत इनाप यानादीगु खः ।