नागरिक न्ह्यलुवाः व मानवअधिकारकर्मीतय् संसदीय समितियात इनाप : सरकारयाके लिसः फ्वं
येँ (नेपालभाषा टाइम्स) – नागरिक न्ह्यलुवाः व मानवअधिकारकर्मीतय्सं सर्वोच्च अदालतया न्यायाधिशतय्त राजीनामा बीत दबाब बिउगु धयागु द्वपं बारे अन्तर्राष्ट्रिय मानवअधिकार संस्थायाके मखुसे सरकारयाके लिसः फ्वनेत संसदीय समितियात इनाप याःगु दु । एमनेस्टी इन्टरनेशनल, ह्युमन राइट्स वाच व इन्टरनेशनल कमिसन अफ जुरिस्ट्स (आईसीजें) जारी याःगु मंकाः वक्तव्यया विषयय् प्रतिनिधिसभाया कानुन, न्याय तथा मानव अधिकार समितिं स्वंगू संस्थायाके स्पष्टीकरण कायेत सरकारया निर्देशन बीवं नागरिक न्ह्यलुवाः व मानव अधिकारकर्मीतय्सं छगू मंकाः विज्ञप्ति जारी यासें थ्व इनाप याःगु खः ।
स्वंगू अन्तर्राष्ट्रिय संस्था वंगु साउन ८ गते छगू वक्तव्य पितबिसें अदालतया वरिष्ठ न्यायधीशपिं सपना प्रधान मल्ल, कुमार रेग्मी व हरिप्रसाद फुयाँलयात राजीनामा बीत दबाब बिउगु व महाअभियोगया धम्की बिउगु विश्वसनीय सुचं वःगु खँ धाःगु खः ।
नागरिक न्ह्यलुवातय्सं थज्याःगु गम्भीर द्वपं वयेधुंकाः संसदीय समितिया न्हापांगु जिम्मेवारी द्वपं बिउगु संस्थायाके स्पष्टीकरण कायेगु मखुसे सरकारयाके सत्यतथ्य व स्पष्ट लिसः फ्वनेमाःगु खँ धासें संविधान व प्रतिनिधिसभा नियमावलीं संसदीय समितियात सरकार व राज्यया निकायया ज्या अनुगमन यायेगु व कार्यपालिकायात संसदप्रति उत्तरदायिी दयेकेगु जिम्मेवारी बिउगु खँ लुमंका बिउगु दु ।
विज्ञप्तिइ अन्तर्राष्ट्रिय मानव अधिकार संस्थायात संसदीय नियन्त्रण वा जवाफदेहिताया दायराय् हयेगु कथं समितिया कार्यादेश व्याख्या यायेगु मिले मजूगु खँ नं धयातःगु दु । लिसें विज्ञप्तिइ एमनेस्टी, ह्युमन राइट्स वाच व आईसीजे नेपाल सरकारया निकाय वा नेपाःया संसदं स्थापित संस्था मखुगु खँ नं न्ह्यथनातःगु दु ।
मानवअधिकार, कानुन शासन व न्यायपालिकाया स्वतन्त्रता सम्बन्धी गतिविधिया अनुगमन व सार्वजनिक रुपय् न्ह्यसः थनेगु मानवअधिकारवादी संस्थाया अन्तर्राष्ट्रिय भूमिका जूगु तर्क नं विज्ञप्तिइ यानातःगु दु । उकथं हे सरकार वा संसदं अज्याःगु संस्थाया निष्कर्ष लिसे असहमत जुइगु, तथ्य व प्रमाणया आधारय् खण्डन यायेगु व विज्ञप्तिया आधार फ्वनेफइगु खँ धासें अलोचनाया लिसः आलोचकतय्के स्पष्टीकरण फ्वनाः वा संसदीय शक्ति छ्यलाः दबाब बीगु लोकतान्त्रिक अभ्यास मजूगु खँ नं विज्ञप्तिइ धयातःगु दु । नागरिक न्ह्यलुवातय्सं न्यायाधीशतय्त राजीनामा बीत दबाब बिउगु वा महाअभियोगया सम्भावनायात राजनीतिक दबाबया रुपय् छ्यःगु खः वा मखु धयागु विषयय् सरकारं हे स्पष्ट व सार्वजनिक लिसः बीमाःगु खँ नं धाःगु दु ।
द्वपं असत्य जूसा सरकारं आधिकारिक, तथ्यपरक व प्रमाणया आधारय् खण्डन यायेमाःगु धासें सरकारयात कयाः न्ह्यसः ब्वलनेधुंकाः सरकार मौन च्वनेगु तर संसदीय समितिं न्ह्यसः थंगु संस्थायाके स्पष्टीकरण कायेत सक्रिय जुइगु संसदीय उत्तरदायित्वया उदेश्य अःखः जुइगु खँ नं विज्ञप्तिइ न्ह्यथनातःगु दु ।
LEAVE YOUR COMMENTS