बिटक्वाइनया भाः ३६ लाख थ्यन

एजेन्सी – भर्चुअल क्रिप्टोकरेन्सी बिटक्वाइनया भाः न्हापांखुसी ३० हजार डलरं च्वय् थहां वंगु दु । बिटक्वाइन छगःया भाः आः नेपाली मू कथं ३६ लाख स्वयां अप्वः थ्यंगु दु । शनिवाः छगः बिटक्वाइनया भाः ३० हजार ८२३.३० अमेरिकी डलर थ्यंगु खः । छुं वाः न्ह्यव जक थुकिया भाः २० हजारं थहां वंगु खः ।

विज्ञतय् कथं अमेरिकी डलरया अवमूल्यन जुइगु क्रम न्ह्यानाच्वंगु अवस्थाय् थुकिया भाः अझ थहां वनेफुगु खँ धाःगु दु । अमेरिकी डलरया भाः थगुने मार्चय् कोरोनाभाइरसया कारणं अप्वःगु खःसा थ्व लिपा अमेरिकी धुकूपाखें यक्व खर्च जूगुलिं डलरया भाः कुहां वनाच्वंगु दु । बिटक्वाइट अमेरिकी डलर वा मेमेगु मुद्रा थें हे छ्यलाबुला जुइ । आः हे जक अनलाइन पेमेन्ट गेटवे पेपालं बिटक्वाइनपाखें कोरोबार यायेफइगु याःगु दु ।

बिटक्वाइनया भाः नं डलर थें थहां कुहां जुयाच्वनेगु याः । सन् २०१७ य् नं बिटक्वाइनया भाः २० हजार डलर थ्यंगु खःसा थुकिया भाः दकलय् म्हो ३,३०० डलर तक नं थ्यंगु दु। थगुने नोवेम्भरय् नं १८ हजार डलर थ्यनेधुंकूगु थुकिया भाः हाकनं कुहां वंगु खः ।