एसियन कप यु २० पाखें नेपाःया नां चिइकल

क्वालालम्पुर – एएफसी यु २० एसियन कप छनोटपाखें नेपाःया नां चिइकूगु दु । यु २० एसियन कप छनोटय् नेपाः ‘डेभलपमेन्ट फेज’ अन्तर्गत समूह आई लय् लानाच्वंगु खः । यु २० एसियन कपपाखें नेपाःया नां चिइकेवं आः नेपालं छनोट कासा म्हिते खनी मखु ।

विश्व फुटबल महासंघ (फिफां) तयातःगु निलम्बनया लिच्वः लिपांगु इलय् नेपाली फुटबलय् प्रत्यक्ष रुपं लानाच्वंगु प्रष्ट खने दयाच्वंगु दु । थ्व स्वयां न्ह्यः साफ फुटबल च्याम्पियनसिप २०२६ या तालिका सार्वजनिक याःगु इलय् उकी नेपाः नां तकं दुथ्याका मतःगु खः । दक्षिण एसियाली फुटबल महासंघ (साफं) सार्वजनिक याःगु तालिकाय् नेपाःया नां दुमथ्यायेवं वइगु नोभेम्बर ४ निसें १७ तक बंगलादेशय् जुइगु साफ फुटबल च्याम्पियनसिपय् दक्षिण एसियाया खुगू टोलीं जक ब्वति काइगु जूगु दु ।

फिफां अखिल नेपाल फुटबल संघ (एन्फा)यात तयातःगु निलम्बनया शिकार नेपाःया उमेर समूहया फुटबल नं लाःगु दु । नेपालं छनोट कासा म्हितेगु निंतिं फिफां एन्फायात तयातःगु निलम्बन अगस्त १ तारिखया दुने फुकुवा जुइमाःगु खः ।

वंगु जुनया लिपांगु वाःपाखे एएफसीं एन्फायात छ्वयाहःगु पती अगस्ट १ तकया दुने फिफां निलम्बन फुकुवा याःसा जक छनोट कासा म्हितेगु खनीगु स्पष्ट याःगु खः । निलम्बन कायम जूगु अवस्थाय् आः नेपालं यु २० एसियन कप छनोट कासा म्हिते मखनीगु जूगु दु ।