ने. सं. ११४४ कौलाथ्व तृतीया -

विश्वकप पुलुपालु

निःशुल्क प्रशिक्षकया प्रस्ताव

फुटबलय् कासा त्याकेगुलिइ गुलि कासामिया भूमिका दइगु खः, उलि हे कासायात रणनीतिक रुपं न्ह्यःने यंकेगु व विपक्षीयात पनेत योजना दयेकेगुलिइ प्रशिक्षकया भूमिका दयाच्वनी । हरेक कासामिया सन्न्यास लिपा फुटबलया प्रशिक्षक जुइगु म्हगस जुइ ।

गुलिखे कासामि प्रशिक्षकय् सफल नं जूगु दुसा छक्वः प्रशिक्षक जुइधुंकूम्हेसित व हे टीमय् हाकनं प्रशिक्षक जुइगु अवसर धाःसा म्हो जक प्रशिक्षकयात प्राप्त जुइ । अले इच्छा याइपिं नं म्हो हे जुइ ।

तर अर्जेन्टिनी फुटबल लेजेन्ड नापं विश्व फुटबलया छम्ह महान् कासामि डिएगो म्याराडोनां अर्जेन्टिनाया प्रशिक जुइत इच्छा क्यंगु दु । सन् २०१० या विश्वकपया इलय् नं अर्जेन्टिनाया प्रशिक्षक जुयाः ज्या यायेधुंकूम्ह म्याराडोनां यदि थःगु देय्या फुटबल संघं थःत प्रशिक्षकया रुपय् सःतल धाःसा निःशुल्क ज्या यायेगुतकं धाःगु दु ।

रसिया विश्वपकय् थःगु देय् अन्तिम १६ य् फ्रान्सनापं बुइवं म्याराडोनां प्रशिक्षक जुइगु इच्छा व्यक्त याःगु खः । यद्यपि सम्झौताकथं जर्ज साम्पाओली सन् २०२२ तकया निंतिं हे अर्जेन्टिनाया प्रशिक्षक खः । थनिं च्यादँ न्ह्यः विश्वकपय् अर्जेन्टिनाया प्रशिक्षक पिहां वयेधुंकाः म्याराडोनां संयुक्त अरब इमिरेट्सा थीथी निगू क्लबया प्रशिक्षक जुयाः ज्या याःगु खः ।

पूर्व विजेताविहीन विश्वकप
फिफा विश्वकपया २१औं संस्करणया नकआउट चरणया अन्त्यलिसें छगू अजू चायापुगु संयोग जुया बिउगु दु । संयोग थ्व अर्थय् कि नकआउट चरणया कासा अन्त्यलिसें थ्व स्वयां न्ह्यः विश्वकप उपाधि त्याकूपिं छम्ह नं कासामि मदया बिउगु दु । अर्थात विश्वकप त्याकूपिं सकलें कासामि रुस विश्वकपय् थःगु यात्रा क्वचायेकाः छेँय् लिहां वनेधुंकूगु दु ।

साविकया विजेता जर्मनी समूह चरणं हे पिहां वंगु दुसा फाइनलिस्ट अर्जेन्टिना नकआउट चरणं हे पिहां वंगु दु । अथे हे सन् २०१० या विजेता स्पेन नं नकआउट चरणं हे पिहां वःगु दु । स्पेनयात आयोजक रुसं बुकूगु खः । थज्याःगुलिइ सन् २०१० या फाइनलिस्ट नेदरल्याण्ड थुगुसी विश्वकपया निंतिं छनोट तकं मजुल ।

अथे हे सन् २००६ या विश्वकप विजेता इटालीं नं थुगुसी विश्वकपया निंतिं छनोट जुयाः वये मफुत ।मेखे सन् २००६ या फाइनलय् थ्यंगु फ्रान्सया सुं नं कासामिं रुस विश्वकप म्हिताच्वंगु मदु । थुगुसी फ्रान्सं म्हितूपिं मध्ये झिंप्यम्ह कासामि न्हूपिं खः । थुपिं सकलें कासामिं फ्रान्सया निंतिं न्हापांखुसी विश्वकपय् प्रतिनिधित्व यानाच्वंगु खःसा सन् २००२ या विजेता ब्राजिलया नं सुं नं कासामिं थुगु विश्वकप म्हिताच्वंगु मदु ।

ब्राजिलया कीर्तिमान

विश्वकपया २१ औं संस्करणय् विश्व फुटबलया सर्वाधिक सफल राष्ट्र ब्राजिलं छगू न्हूगु कीर्तिमान कायम याःगु दु । न्याक्वःतकया उपाधि विजेता ब्राजिलं विश्वकप फुटबलय् दकलय् अप्वः गोल याःगु राष्ट्रया रुपय् न्हूगु कीर्तिमान कायम याःगु खः । ब्राजिलं थ्व स्वयां न्ह्यः विश्वकप फुटबलय् जर्मनीया नामय् दुग कीर्तिमानयात लिफ्यानाः दकलय् अप्वः गोल याःगु देय्या रुपय् न्हूगु कीर्तिमान तःगु खः ।

रसिया जुयाच्वंगु विश्वकप फुटबलय् ब्राजिलं २२८ गोलया कीर्तिमान तःगु खः । फिफा विश्वकप फुटबल अन्तर्ग समूह चरण पार यानाः नकआउट चरणय् मेक्सिको विरुद्ध जूगु कासाय् याःगु गोललिसें ब्राजिलं थ्व कीर्तिमान तःगु खः । ब्राजिलं मेक्सिको विरुद्धया कासाय् २ गोल यायेवं थ्व कीर्तिमान च्वंगु खः ।

थ्व स्वयां न्ह्यः जर्मनीया नामय् विश्वकप फुटबलय् २२६ गोलया कीर्तिमान दयाच्वंगु खः । मेक्सिको विरुद्धया कासाय् ब्राजिलया नेयमारं याःगु गोलं विश्वकपय् थःगु देय्या २२७ औं गोलया रुपय् कीर्तिमान तःगु खःसा वयां लिपा वैकल्पिक कासामि फेर्मिनों टीमया निंतिं निगूगु व समग्र विश्वकपय् देय्या निंतिं २२८ औं गोलया कीर्तिमान तःगु खः ।