ने. सं. ११४४ ञलागा पारू -

टेनिसया मोहम्मद अली

टेनिसया महान कासामि रोजर फेडरर । थ्व हे महान कासामियात थौंकन्हय् बक्सिङया मेम्ह महान कासामि मोहम्मद अलीलिसे तुलना यानाहःगु दु । थ्व तुलना मेता कारणं मखु, वंगु दछिया दुने वं त्याकाहःगु ग्रान्डस्लाम उपाधीया कारणं खः ।छगू इलय् फेडररया युग सिधल धयागु अवस्था तकं वयेधुंकूगु खः । मदिक्क जुयाच्वंगु चोटया कारणं ग्रान्डस्लामया कीर्तिमानी कासामि झ्वःलाक हे छुं कासा त्याकेमफुगु स्थितिइ थ्यनेधुंकूगु खः । थज्याःगु निराशाजनक अवस्था वयेधुंकाः नं फेडररं टेनिस कोर्टय् थःत हाकनं प्रमाणित यानाबिउगु दु । वंगु खुलाया दुने हे वं निगू ग्रान्डस्लाम त्याकेधुंकल ।

अलीं नं थथे हे थ्यंमथ्यं बक्सिङं पिने च्वनेधुंकाः नं लिपा रिङय् लिहां वयाः विश्व च्याम्पियनया उपाधी ल्हातय् लाकूगु खः । छगू कथं बक्सिङं संन्यास हे कायेधुंकूम्ह थें च्वनाच्वंम्ह अलीं थः ३२ दँ थ्यनेधुंकाः नं किंशासाय् रिङय् लिहां वयाः जर्ज फोरम्यानपाखें थःगु उपाधी लाकाकाःगु खः । उबलय् अलीं कासा त्याकी धकाः म्हो हे मनूतय्सं जक अनुमान याःगु खः ।फेडररं थगुने अस्टे«लियन ओपन त्याकूबलय् सकसिनं हाकनं जक वयागु युग लिहां वःगु महसुस याःगु खः । छाय्कि थ्व ग्रान्डस्लाम त्याकेत फेडररं न्यादँ तक पी माल । थ्वयां न्ह्यः ला अप्वःसिनं फेडरर आः इतिहास जुइधुंकल धायेधुंकूगु खः ।

छाय्कि व ३५ दँ थ्यनेधुंकल, अले पुलिया सर्जरी, जँय् समस्याया कारणं खुला तक ला टेनिस कोर्टं पिने लायेधुंकल । वरियता क्रमय् नं कुहां वनाः १७ औं थासय् लायेधुंकूगु खः । सन् २०११ निसें २०१६ या न्यादँ दुने वं लाक्क छगू जक ग्रान्डस्लाम त्याकेत ताःलाःगु खः ।आः कोर्टय् हाकनं फेडररया ‘जलवा’ खने दयाच्वंगु दु । दछिया दुने स्वंगू स्वंगू ग्रान्डस्लाम त्याकाः वं आलोचक सकसितं चकित यानाबिउगु दु । ३६ दँ थ्यनेधुंकूम्ह फेडररं थगुने न्हापां अस्ट्रेलियन ओपन त्याकाः थुकिया सुरुवात याःगु खः । नकतिनि हे जक वं थःगु ग्रान्डस्लाम धलखय् मेगु छगू अस्ट्रेलियन ओपनया उपाधी थप याःगु दु ।

थ्व वयागु क्यारियरया २० गूगु ग्रान्डस्लाम खः । थ्व कीर्तिमानी उपाधी त्याकेगु झ्वलय् फेडररं थःत उमेरं छुं मपं धयागु क्यनाबिल । आइतवाः मारिन चिलिचलिसे जूगु फाइनल कासा न्ह्यः वं थःत मोटिभेट यायेत ग्यारी ओल्डम्यानया बोयापिक चर्चित स्वःवंगु खः । अले स्वघौ तक न्ह्याःगु फाइनल कासाय् वं लिचिलयात ६–२, ६–७, ६–३, ३–६, ६–१या सेटं बुकल ।स्वीस कासामि फेडररया थ्व खुगूगु अस्ट्रेलियन ओपन उपाधी खःसा क्यारियरया नीगूगु ग्रान्डस्लाम । दकलय् अप्वः ग्रान्डस्लाम त्याकूम्ह कासामिया कीर्तिमान फेडररया हे नामय् दु । वयागु ग्रान्डस्लाम उपाधी निगूगु थासय् लानाच्वंम्ह राफेल नाडालया स्वयां प्यंगू अप्वः खः । वंगु निला न्ह्यवंनिसें रफाल नाडाल लिसें वरियताया निंतिं धेंधेंबल्लाः यानाच्वंम्ह फेडरर आः वइगु मार्चय् हाकनं विश्व वरियताया शीर्षस्थानय् वइगु सम्भावना यक्व दु ।