फिफाया आकस्मिक बैठक आह्वान

बीबीसी – विश्व फुटबल महासंघ (फिफा)या अध्यक्ष जियानी इन्फान्टिनों फिफा पदाधिकारीतय् आकस्मिक बैठक सःतूगु दु । फिफा अध्यक्ष इन्फान्टिनों थःगु विवादास्पद व्यावसायिक योजना लित कायेधुंकाः ब्वलंगु विवाद ज्यंकेया निंतिं मोरक्कोय् फिफा वरिष्ठ पदाधिकारीतय् आकस्मिक बैठक सःतूगु खः ।

अध्यक्ष इन्फान्टिनों विश्वकप फुटबललिसें फिफां ग्वसाः ग्वइगु प्रमुख कासा संचालनया अधिकार निजी ख्यः (संस्था)यात नं बीगु उद्देश्यं ‘फिफा फरवार्ड इन्टरप्राइज’ नांया योजना हःगु खः । उकियात विश्वया थीथी महादेशया फुटबल महासंघं व्यापाकर आलोचना यायेवं उकियात लित नं काःगु खः ।

फिफाया प्रमुख ग्लोबल फुटबल विकास अधिकारीलिसें इंग्लिश क्लब आर्सनलया पुलांम्ह प्रशिक्षक आर्सेन वेंगरं उगु योजना लित कायेमाःगु अतिकं आवश्यक जूगु व लित कायेगु सही निर्णय जूगु धाःगु दु ।

इन्फान्टिनों हःगु योजनाय् थःगु गुगुंकथंया संलग्नता मदुगु स्पष्ट यासें वेंगर थम्हं नं उकिया जानकारी संचारमाध्यमपाखें जक सिउगु धाःगु दु । फिफां पारदर्शी, इमान्दारी व स्वतन्त्रताया लिधंसाय् फुटबलया सेवा यायेमाःगु धाःगु दु ।

मोरक्कोय् जुइगु बैठकय् फिफाया महासचिव माटियास ग्राफस्ट्रोम, प्रमुख वित्त अधिकृत थोमस पेयर, कानुनी प्रमुख एमिलियो गार्सिया सिल्भेरो, सदस्य संघ प्रमुख एल्खान मम्मादोभ, संचार निर्देशक ब्रायन स्वान्स लगायतया उच्च अधिकारीत सहभागि जुइगु बीबीसीं न्ह्यथंगु दु ।