
येँ / किपू नगरपालिकाया ग्वसालय् जूगु नेपालभाषा चिहाः संकिपा कासाय् डेल्टा प्रोडेक्सनपाखें दयेकूगु ‘साःगः’ संकिपा न्हाप लाःगु दु। म्हिगः शनिवाः येँया राष्ट्रिय सभागृहय् कासाय् सहभागी चिहाः संकिपाया प्रिमियर शो लिसें सिरपाः लःल्हाःगु खः ।
कासाय् नेवाः युट्युबया न्ह्यब्वया ‘आजुद्यः’ लिउ, शशिकला मानन्धरया न्ह्यब्वया ‘लाखय् पाः’ लियांलिउ व फोकस पिक्चर्सया न्ह्यब्वया ‘न्हय्का सिँ’यात हःपाः सिरपाः लाःगु खः ।
ढनेपालभाषा चिहाः संकिपा कासाय् किपू नगरपालिकां याःगु आःतकया दकलय् अप्वः नगद सिरपाः दुगु धेंधेंबल्लाः खः । थ्व कासाय् न्हाप लाःगु संकिपायात छगू लाख तका, लिउयात न्हय्न्याद्वः तका, लियांलिउयात न्यय्द्वः तका व हःपाःयात नीन्याद्वः तका लिसें दसिपौ व ट्रफि लःल्हाःगु खः । अथेहे ब्वति काःगु फुक्कं संकिपायात झिद्वः–झिद्वः तका नं लःल्हाःगु खः ।
ज्याझ्वःया अध्यक्षता यानादिसें किपू नगरपालिकाया मेयर रमेश महर्जनं संकिपाया माध्यमं किपू देय्या संस्कृति, सम्पदा, किंवदन्ती न्ह्यब्वयाः किपू देय्यात पर्यटकीय नगरीया रुपय् प्रचार यायेगु ताःतयाः थ्व कासा यानागु खँ कनादिल । थ्व कासाय् किपूलिसे स्वाःगु बाखनय् जक संकिपा दयेके बीगु खः ।
थ्व हे कथं कासाय् ब्वति काःगु न्हय्गुलिं चिहाः संकिपाया बाखं किपूया इतिहास, किंवदन्ती, संस्कृतिया आधारय् दयेकातःगु खः । ज्याझ्वःया उलेज्या यानादिसें मूपाहां संस्कृति, पर्यटन तथा नागरिक उड्डयन मन्त्री भानुभक्त ढकालं संकिपाया माध्यमं किपूया म्हसीका बियाः पर्यटकीय विकास यायेगु बांलाःगु ज्या जूगु खः धासें किपूया विकासय् सरकारपाखें माःगु ग्वाहालि यायेगु खँ धयादिल ।
कलाकःमि लक्ष्मीकुमार महर्जनया संयोजनय् थ्व कासा जूगु खःसा संस्कृतिविद् रामकृष्ण दुवालया नेतृत्वय् निर्णायक मण्डल दयेकाः सिरपाः त्याकूगु संकिपा ल्यःगु खः ।
LEAVE YOUR COMMENTS