यलय् जुइगु कला संस्कृति महोत्सव घोषणा

येँ – थ्वहे चैत १३ गते निसें १७ गते तक यल महानगरपालिका १६ वडाय् कला संस्कृति महोत्सव यायेगु घोषणा याःगु दु । शुक्रवाः छगू ज्याझ्वःया दथुइ १६ वडाया अध्यक्ष निर्मलरत्न तुलाधरं विश्व कला परिषदं् यलयात कला नगरी घोषणा याःगु झ्वलय् थ्व महोत्सव यायेत्यनागु खँ धयादिल ।

थ्व झ्वलय् वय्कलं यलया १६ वडाय् ६० प्रतिशत स्वयां अप्वः हस्तकला व्यवसाय यानाच्वंगु खँ धयादिल । ज्याझ्वलय् न्ववानादिसें यल उद्योग वाणिज्य संघया अध्यक्ष कृष्णलाल महर्जनं महोत्सवया निंतिं संघं आवश्यक ग्वाहालि यायेगु खँ धयादिल ।

अथेहे नेपाल हस्तकला महासंघया निवर्तमान अध्यक्ष धर्मराज शाक्यं विश्व कला परिषदं यलयात कला नगरी घोषणा यायेधुंकाः थनया हस्तकला व्यवसायी व कलाकारत फुक्क् आः विश्वया हे कलाकार जूगु खँ धयादिसें आः कला नगरीया निंतिं आवश्यक छुं छुं पूर्वाधार दयेकेगु निंतिं यल महानगरं ज्या यायेमाःगु खँ धयादिल ।

ज्याझ्वलय् नेपाल हस्तकला महासंघ व यल हस्तकला संघया नवनिर्वाचित पदाधिकारीपिंत लसकुस यायेगु लिसें यल महानगरव्यापी मेयर कप टेबल टेनिसय् त्याकूपिंत हनेज्या नं याःगु खः ।