ने. सं. ११४६ चाैलागा चर्हे - मातातीर्थ चःह्रे

सम्भावित बय्लाछिइ पुरातात्विक अवशेष मलुल

येँ – येँ मनपा २७ वडाया ज्याकू दयेकेगु धकाः प्रस्तावित जुयाच्वंगु ज्याथाया जग्गाय् पुरातत्व विभागपाखें याःगु उत्खनन्य् छुं कथंया पुरातात्विक ज्वलं लुया मवःगु खँ धाःगु दु ।

वडा भवन दयेकीगु धाःगु जग्गाय् पुलांगु फल्चा दयेमाः धइगु अनुमान यासें पुरातत्व विभागं वंगु स्वन्हु न्ह्यवंनिसें उत्खनन् शुरु याःगु खः । म्हिगः करिब साढे ५ फिट तक म्हुइधुंकाः नं चा बाहेक मेगु छुं हे लुया मवःगुलिं अन फल्चा वा मेगु छुं कथंया संरचना दयेमाः धइगुया प्रमाण चूमलाःगु खँ धाःगु दु ।

२७ वडाया वडाध्यक्ष चिनियाँमान वज्राचार्यं अन छुं पुरातात्विक ज्वलं लुया मवःगुलिं आः वडा ज्याकू दयेकेगु लुखा चाःगु खँ कनादिल । म्हिगः ‘नेपालभाषा टाइम्स’ लिसे खँ ल्हासें वय्कलं पुरातत्वं छुं ज्वलं लुया मवःगुलिं म्हिगः हे गाः त्वपुना बी धाःगु खःसां थःपिंसं त्वपुइ मते धकाः खुल्ला हे याना तयागु खँ नं कनादिल । यदि अन फल्चा दु धइगु छुं प्रमाण लुया वःगु जूसा अन थःपिंसं फल्चा हे दना बी धकाः वडा अध्यक्ष वज्राचार्यं बचं बियादीगु खः ।

अथे हे उगु जग्गाया लालपूर्जा दुगु स्थानीय ज्याथा क्लबया अध्यक्ष इन्द्रमान महर्जनं नं अन न्हापा अनुमान यानातःथें फल्चाया छुं हे अवशेष लुया मवःगु खँ ‘नेपालभाषा टाइम्स’ यात कनादिल । अथे खःसां पुरातत्व विभागं आधिकारिक रुपं मधाःतले थःपिंसं छुं दावी याये मछिंनिगु खँ नं वय्कलं कनादिल ।

पुरातत्वं छ्वया हःपिं मनूतय्सं स्वन्हु तक म्हुयाः नं छुं लुया मवयेवं थन पुरातात्विक संरचना मदु धइगु हे पुष्टि जुल धकाः धाःगु खँ वय्कलं कनादिल । अय्नं थुकिया बारे पुरातत्वं लिखित रुपं हे वडा ज्याकूयात पौ छ्वया हःगु जूगुलिं आः उत्खनन् लिपा छु नतिजा पिहां वल धइगु खँ नं लिखित रुपं हे वइगु जुइमाः धकाः नं वय्कलं कनादिल ।

स्थानीय सम्पदाप्रेमितय्सं धाःसा नापसं च्वंगु छुस्याबलय् च्वंगु छगू शिलापत्रकथं छुस्याबहाःया पिने बय्लाछि दुगु व उगु लाछिइ छगू फल्चा नं दयेमाःगु स्पष्ट खने दुगु जूगुलिं उगु लाछि व फल्चा धइगु आः वडा ज्याकू दयेकेत्यंगु जग्गा हे खः धकाः दावी यानाच्वंगु दु । थ्व फल्चा व लाछि छुस्याबहाःयागु हे सम्पत्ति जूगु कारणं अन छुं कथंया संरचना मदयेकुसे खुल्ला हे त्वःतेमाः धइगु नं वय्कःपिनि दावी दु । तर स्थानीय क्लबं धाःसा अन वडा ज्याकू दत धाःसा स्थानीय मनूत लिसें छुस्याबहाःयात हे फाइदा जुइगु खँ धायेगु यानाच्वंगु दु ।