अक्सिजन मदयाः कोरोना मखुपिं विरामीत नापं पीडित

येँ – कोरोना महामारीया कारणं अक्सिजनया माग तच्वकं अप्वया वनेवं उकिया लिच्वः कथं नियमित अक्सिजन कयाच्वनेमाःपिं दीर्घ ल्वय् दुपिं विरामीत प्रभावित जूगु दु । बजार दुगु दक्व अक्सिजन कोरोना विरामीतय्सं न्याना यंकूगु कारणं नियमित अक्सिजन कयाच्वनेमाःपिं अन्य ल्वय्या विरामीतय् निंतिं अक्सिजन मदयाः समस्या जूगु खँ सम्बन्धित पीडिततय्सं धाःगु दु ।

येँया मखं त्वालय् च्वंम्ह स्थानीय सुजनविलास वज्राचार्यं नियमित रुपं अक्सिजन कयाच्वनेमाःम्ह थः मांया लागिं बजारय् अक्सिजन न्याये मदयेवं थःपिंत मर्का जूगु खँ कनादीगु दु । वय्कःया ७२ दँ दुम्ह मां नानीबाबा वज्राचार्य वंगु गुदँ न्ह्यवंनिसें नियमित रुपं अक्सिजन कया च्वनेमाःम्ह खः । तर कोरोनाया महामारी न्यना वनेवं बजारय् अक्सिजन न्याये मदयाः वय्कःया मां थेंज्याःपिं कोरोना मखुपिं विरामी समेत प्रभावित जुयाच्वंगु दु ।

स्वन्हु न्ह्यः मांयागु अक्सिजन फूगुलिं न्ह्याबलें अक्सिजन कयाच्वनागु थासय् अक्सिजन काः वनाबलय् अक्सिजन मदुगुलिं छुं न्हि पीमाःगुलिं विरामीयात समस्या जूगु खँ वज्राचार्यं ‘नेपालभाषा टाइम्स’ यात कनादिल । थःपिंत जूगु थ्व समस्या बारे वय्कलं सामाजिक सञ्जालय् नं च्वयाः अवगत याकादीगु खः ।

छाति सम्बन्धी ल्वय्या विरामी वय्कःया मांयात २४ घौ हे अक्सिजन तया तयेमाः । मांयात नियमित बीमाःगु अक्सिजन म्हो मजुइमा धकाः छेँय् अक्सिजन कन्सन्ट्रेटर व्यवस्था यानातःगु खःसां थ्वहे इलय् उगु मेसिन नं स्यनाः समस्या जुयाच्वंगु खँ वय्कलं कनादिल ।
वय्कलं कनादी कथं थौंकन्हय् अक्सिजन कायेथाय् वय्कःया मां थें नियमित अक्सिजन माःपिं मेपिं विरामीत नं ग्वाःग्वाः हे अक्सिजनया लागिं पिउ वयाच्वंगु दु । कोरोना महामारीया कारणं बजारय् खने दुगु थ्व अक्सिजन अभावं यानाः नियमित अक्सिजन कायेमाःपिं दीर्घ रोगीतय् छेँजःपिं त्रसित जुयाच्वंगु दु ।

अथे ला कम्पनीतय्सं नियमित अक्सिजन कायेमाःपिं विरामीतय् निंतिं बिस्कं अक्सिजन सिलिन्डरया व्यवस्था यानातःगु दु । तर नं आः देय्न्यंकं हे अक्सिजनया अभाव जुइवं थीथी कथंया सिलिन्डरय् अक्सिजन जायेकाः विरामीतय्त बीगु यानाच्वंगु दु । अक्सिजन कम्पनीतय्सं अटोमोबाइलया निंतिं बिस्कं व उद्योगया निंतिं बिस्कं हे सिलिन्डरया व्यवस्था यानातःगु दु ।

सम्बन्धित बुखँ

LEAVE YOUR COMMENTS