ललितपुर सनचाँदीया रजत महोत्सव हन
यल – ललितपुर सुनचाँदी व्यवसायी संघया रजत महोत्सव समापननापं संघया न्हय्क्वःगु साधारणसभा व स्वक्वःगु अधिवेशन वंगु शनिवाः जुल । थनया शंखमुलय् च्वंगु यल दरवार बैंक्वेटय् जूगु ज्याझ्वःया उलेज्या शताब्दीपुरुष सत्यमोहन जोशीं त्वाः देवाय् मत च्याकाः उलेज्या यानादीगु खः ।
संघया अध्यक्ष किरणभाई वज्राचार्यया सभापतित्वय् न्ह्याःगु ज्याझ्वलय् विशेष पाहांकथं ललितपुर जिल्ला प्रशासन ज्याकूया प्रमुख भगिरथ पाण्डे, संघीय सांसद नवराज लिवाल, उपभोक्ता मञ्चया अध्यक्ष प्रेमलाल महर्जन, रत्न तथा आभूषण महासंघया अध्यक्ष रमेश महर्जन, पूर्वमन्त्री नापं संघया सल्लाहकार बुद्धिराज वज्राचार्य, सल्लाहकारपिं तीर्थमान शाक्य, तेजरत्न शाक्य, सुनचाँदी व्यवसायी संघ प्रदेश नं ३ या संयोजक दियसरत्न शाक्य, सुनचाँदी व्यवसायी महासंघया कोषाध्यक्ष महेन्द्ररत्न शाक्य लगायत थीथी जिल्लाया संघया पदाधिकारीपिं झायादीगु खः ।
ज्याझ्वलय् मूपाहां जोशीं संघं २५ दँया थीथी इतिहासयात दुथ्याकाः प्रकाशित याःगु ‘हेमालंकार’या उलेज्या नापं कालिगन संघया दुजः शरद शाक्य, नेपाल बार एशोसिएसन यल जिल्लाया अध्यक्ष नापं कानुनी सल्लाहकार, नेवाः पत्रकार राष्ट्रिय दबू केन्द्रीय नायः सुरजवीर वज्राचार्ययात सम्मान याःगु खःसा संघया अध्यक्ष वज्राचार्यं मूपाहां जोशीया विशेष सम्मान यानादीगु खः । अथे हे मूपाहां जोशीं रजत जयन्ती मूल समारोह समितिया ३२ म्ह दुजःपिंत कदरपत्र बियाः सम्मान याःगु खःसा विशेष पाहांपिंत संघया मतिनाया चिं नं लःल्हायेगु ज्या जूगु खः ।
उगु ज्याझ्वलं संघया न्हूगु ज्यसना पुचःया नं ल्यज्या याःगु खः । ल्यज्याकथं रमेशबहादुर वज्राचार्ययात संघया न्हूम्ह नायः ल्यःगु दु । वज्राचार्यया नेतृत्वय् ल्यःगु न्हूगु ज्यासना पुचलय् प्रथम उपाध्यक्ष मोतिमा (हेम) शाक्य, द्वितीय उपाध्यक्ष विजेन्द्र वज्राचार्य, महासचिव विक्रम शाक्य, सचिव संजय शाक्य, कोषाध्यक्ष हेराकाजी शाक्य, सह कोषाध्यक्ष राजेन्द्र शाक्य व दुजलय् सिद्धिरत्न वज्राचार्य, सुदन शाक्य, राकेश शाक्य व निरञ्जन वज्राचार्यपिं सर्वसम्मत निर्वाचित जूगु जानकारी निर्वाचन कमिटीया संयोजक किरण शाक्यं बियादीगु खः ।
LEAVE YOUR COMMENTS