अक्टोवरय् जापान वनेगु निंतिं परीक्षा

येँ – सरकारं जापान वनीपिं नेपाली ज्यामितय् निंतिं आवश्यक भाषा व सीपसम्बन्धी परीक्षा वइगु अक्टोवरय् काइगु जूगु दु । श्रम मन्त्रालयं अक्टुवरया अन्तिम वाः पाखे परीक्षा जुइगु खँ धाःगु दु । जापान सरकारं आःया निंतिं ‘केयरगिभर’ कथं जक ज्यामित यंकेत्यंगु जूगुलिं उकिया निं न्हापां भाषा परीक्षा जुइगु खँ मन्त्रालयं धाःगु दु ।

मन्त्रालयया सचिव महेशप्रसाद दाहालं बिबिसीलिसे खँ ल्हासें अक्टोवरया २७ व २८ तारिखय् परीक्षा जुइगु खँ धयादीगु दु । थ्व धुंकाः सीप सम्बन्धि परीक्षा नोवेम्भरया ६ व ७ तारिख जुइ । वय्कलं जापानं आः थथें गुलि ज्यामि यंकेगु धयागु बारे खुलस्त मयाःनिगु खँ नं धयादीगु दु । भाषा व सीप परीक्षा क्वचाःगु निला लिपा हे सफल जूपिं नेपाली ज्यामित जापान वनेखनीगु खँ धाःसा वय्कलं धयादीगु दु ।

वंगु चैतया निगूगु वालय् नेपाः व जापान दथुइ नेपाःमि ज्यामितय्त जापान यंकेगु बारे समझदारी जूगु खः । आः जापान लिसे ज्यामितय् स्वास्थ्य जाँच, परीक्षा शुल्क व टिकट बारे सहलह जुयाच्वंगु खँ नं वय्कलं धयादीगु दु । सचिव दाहालं आःतक परीक्षा शुल्क व जापान वनेगु टिकट ज्यामिं हे पुलेमाःगु धयागु खँ वयाच्वंसां निर्णय हे थ्यंक मजूनिगु खँ धयादीगु दु ।

जापान सरकारं आःया निंतिं ‘केयरगिभर’ ज्यामित निं यंकेत्यंगु जूगुलिं उकिया निं न्हापां भाषा व सीप परीक्षा जुइगु, परीक्षा जूगु निला लिपा हे जापान वनेखनीगु

जापानय् ज्यामितय् अभाव जुइवं वंगु डिसेम्बरय् जापानया मन्त्रिपरिषदं विदेशं ज्यामित दुत हयेगु नीति पारित याःगु खः । थ्व नीति लिपा ज्यामित यंकेगु देय्तय् धलखय् नेपाःयात नं दुथ्याकूगुलिं नेपाःमि ज्यामित जापान वनेगु लँ चाःगु खः । जापानं ज्यामि यंकेगु धलखय् नेपाःलिसें मेगु च्यागू देय्यात दुथ्याकूगु खः ।

जापानं नेपाःमि ज्यामितय्त झिंप्यंगू थीथी क्षेत्रय् ज्या यायेगु निंतिं यंकी । थुकी नर्सिङ, सरसफाइ, उत्पादनमूलक क्षेत्र, होटल, कृषि, न्या लायेगु व खाद्य प्रशोधन क्षेत्र लाः । जापानं न्हापांगु चरणय् केयरगिभरया रुपय् नेपाः व फिलिपिन्सया ज्यामितय्त यंकेत्यंगु खः ।
जापान सरकारं न्यादँया निंतिं ३लाख ४५ हजार विदेशी ज्यामित कायेत्यंगु दु ।

ज्यामित यंकेगु गुंगू देय् मध्ये नेपाःयात प्राथमिकता बियातःगु खः । उकिं न्हापांगु चरणय् हे नेपाःमि ज्यामितय्त जापान यंकेत्यंगु खः ।
मेखे ताःई न्ह्यव निसें जापानय् च्वना वयाच्वनादीम्ह चिकित्सक व अनुसन्धानकर्ता डा. प्रकाश शाक्यं बिबिसी लिसे खँ ल्हासें नेपाली ज्यामितय्त जापान छ्वयेबलय् भाषा व सीप परीक्षा कायेधुंकाः छुं छुं विषयय् परामर्श नं बीमाःगु खँ धयादीगु दु ।

वय्कःया कथं जापानय् उपचारया निंतिं आधारभूत भाषाया ज्ञान जक दयां मगाः । जापानय् च्वनाच्वंपिं अप्वःथें नेपाःमितय्त आः नं उपचारया निंतिं भाषा व स्वास्थ्य बीमाय् समस्या वयाच्वंगु खँ वय्कलं धयादीगु दु । थन च्वनाच्वंपिं नेपाःमितय्सं स्वास्थ्य बीमा दँय्दसं मयाइगुलिं धाथें बिरामी जुइबलय् उपचार यायेत समस्या जुयाच्वंगु खँ वय्कलं धयादिल ।

अथेहे विशेष यानाः मानसिक समस्या जुइबलय् नेपाःमितय्सं जापानी चिकित्सकयात थःगु ल्वय्या बारे खँ हे थुइकेमफयाच्वंगु खँ नं वय्कलं धयादिल ।‘जिं अज्याःपिं नेपाःमित यक्व नापलाःगु दु, गुमित स्वास्थ्य बीमाया महत्व बारे सि हे मसिउ। उकिं आवश्यक जूगु इलय् उमिसं उपचार यायेत समस्या फयेमालाच्वन ।

उकिं आः नेपाःमि ज्यामित छ्वयाहयेबलय् थज्याःगु खँया नं परामर्श बिया हयेमाः ।’ थुकिया लिसें नेपाःमितय्त अनया सांस्कृतिक खँया बारे नं जानकारी बिया हयेमाःगु बिचाः वय्कःया दु ।

सम्बन्धित बुखँ

LEAVE YOUR COMMENTS