एनसेल प्रकरण आः पुँजीकर लाभकर गुकथं म्हइ

येँ – सर्वोच्च अदालतं एनसेल मीउबलय्या पूँजीगत लाभकर आजियाट व एनसेल पाखें हे उठे यायेत आदेश बिइवं आः थ्व कर गुकथं उठे याइ धयागु खँया चर्चा सुरु जूगु दु । सर्वोच्च अदालतया परमादेश वयेधुंकाः आइतवाः च्वंगु संसदया अर्थ समितिया बैठकं नं कर म्हयेगु निंतिं निर्देशन बिउगु खः ।

राजश्व अधिकृततय्सं सर्वोच्चया फैसलाया पूर्ण पाठ मवःनिगुलिं आः थथें गुकथं उठे यायेगु धयागु बारे क्वःछिइ मफुनिगु खँ धाःगु दु । अर्थ समितिया आइतवाः च्वंगु बैठकय् नं अर्थमन्त्री युवराज खतिवडां थ्व हे खँ धयादीगु खः । सर्वोच्चया फैसला लिपा आः मलेसियन कम्पनी एक्सिआटया लिसें एनसेल ध्यबा मपुसे च्वने फइगु अवस्थाय् मदुगु खँ अर्थविद्तय्सं धाःगु दु ।

एनसेलय् मलेसियन कम्पनी एक्सिआटया ८० प्रतिशत शेयर दु । एनसेल न्यानाकाःगु एक्सिआटं न्हापां निसें कर पुलेगु दायित्व थःपिनिगु मखु, कम्पनी मिउपिनिगु खँ धयाच्वंगु खः । थज्याःगु अवस्थाय् आजियाटपाखें ध्यबा म्हयेगु निंतिं छु गज्याःगु प्रक्रिया नालेगु धयागु बारे स्पष्ट रुपं सुनां नं मधाःनि ।

राजश्व अधिकारी व अर्थमन्त्रालयया अधिकारीतय्सं सर्वोच्चया फैसलयाा पूर्णपाठ वल धायेवं जक गुकथं उठे यायेगु, गुबलय् तकया दुने उठे यायेगु व गुलि ध्यबा सुयापाखें उठे यायेगु धयागु बारे स्पष्ट रुपं धायेफइगु खँ धाःगु दु ।सर्वोच्चं गुकथं ध्यबा उठे यायेगु, गुलि दुने उठे यायेगु व गुलि ध्यबा उठे यायेगु धयागु बारे पूर्ण पाठय् स्पष्ट रुपं वयेफुगुलिं नं राजश्व कार्यालयं प्रक्रिया बारे छुं मयासे च्वंगु खः ।

सर्वोच्चया फैसलाय् हे थ्व फुक्क स्पष्ट रुपं वल धाःसा राजश्वं व हे कथं ध्यबा म्हयेगु ज्या यायेमाली । यदि सर्वोच्चया फैसलाय् थज्याःगु खँ स्पष्ट रुपं मवसे ध्यबा उठे यायेत आदेश जक बिल धाःसा राजश्व विभाग पाखें थप कानुनी प्रक्रिया कथं लाभकर म्हयेमाली । तर आः कर म्हयेगु दायित्व धाःसा सरकारया आन्तरिक राजश्व विभाग व विभागया ठूला करदाता कार्यालययात वःगु खँ विज्ञतय्सं धाःगु दु ।

पुलांम्ह कार्यवाहक महालेखा परीक्षक सुकदेव भट्टं विविसीलिसे खँ ल्हासें कर म्हयेगु ज्याया कार्यान्वयन आः ठूला करदाता कार्यालयमार्फत यायेमाःगु खँ धयादीगु दु । थुकिया निंतिं ठूला करदाता कार्यालयं ई तोके यानाः एनसेल व एक्सिआटयात ध्यबा पूवयेत पौ छ्वयेफइगु खँ धाःगु दु । थ्व पौ कथं कम्पनीं बियातःगु ई दुने ध्यबा पूवनेमाःगु व्यवस्था दु ।

वय्कःया कथं कम्पनीं ध्यबा हे मपुल धाःसां नं सरकारं याउँक हे उठे यायेफइगु स्थिति दु । एनसेलया आः नं नेपालय् दुगु ध्यबा व मेमेगु सम्पत्ति आः याउँक विदेश यंकेफइमखु । वय्कलं धयादीगु दु, ‘अदालत प्रक्रिया व कानुनी प्रक्रियां थुलि हे न्हि दुने दाखिला या धकाः मधाःसां सरकारं चाहे जुल धाःसा नेपालय् दुगु उमिगु ध्यबा कटे यानाः नेपाः सरकारया खाताय् हयेफइ ।’

थ्व मुद्दाय् एनसेल हाकनं सर्वोच्चय् वने फइगु स्थिति धाःसा मदुगु खँ कानुनविद्तय्सं धाःगु दु । आःया फैसला सर्वोच्च अदालतया वृहत् पूर्ण इजलासं वःगुलिं थुकिया विरुद्ध हाकनं अदालतय् वनेगु स्थिति धाःसा कम्पनीया मदयेधुंकूगु खँ धाःगु दु । थ्व मुद्दा अन्तर्राष्ट्रिय अदालतय् यंकेगु सम्भावना नं म्हो हे जक दुगु खँ उमिसं धाःगु दु ।

थ्वहे दथुइ संसदया अर्थ समितिं एनसेलया पूँजीगत लाभकर सम्बन्धी निर्णयय् संलग्न फुक्क मन्त्रालय व निकायया सरकारी अधिकारीतय्त छानविन न्ह्याकीगु जूगु दु । आइतवाः च्वंगु समितिया बैठकं थीथी सरकारी निकायपाखें एनसेलया पूँजीगत लाभकर बारे याःगु निर्णय झिके यायेत निर्देशन नं बीधुंकूगु दु ।

बैठकं ऐनसेल प्रकरणय् अर्थ, सञ्चार तथा सूचना प्रविधि व उद्योग मन्त्रालय लिसें नेपाल राष्ट्र बैंकपाखें सम्बन्धित विवरण न्हय्न्हु दुने झिके यायेगु क्वःछिउगु खः । समितिं स्पाइस नेपाल प्रालिया नामं उगु कम्पनी नीस्वसां निसें झिंनिक्वः तक जूगु शेयर विक्री सम्बन्धी फुक्क विवरण माग याःगु दु ।

अथेहे बैठकं पूँजीगत लाभकर बारे निर्णय प्रक्रियाय् प्रत्यक्ष व अप्रत्यक्ष रुपं संलग्न जिम्मेवार सरकारी पदाधिकारी व अधिकारीतय् पूवंक विवरण नं झिके यायेगु क्वःछिउगु खः ।अथेहे ऐनसेलपाखें कायेमाःगु पूँजीगत लाभकर बारे अदालतं जूगु आदेश व नेपालपाखें पिहां वनेधुंकूगु विदेशी मुद्राया विवरण नं माग याःगु दु ।

समितिया सभापति कृष्णप्रसाद दाहालं लाभकर कायेगु खँय् दोषी खनेदुपिं सकसितं कारवाही सिफारिस यायेमाःगु खँ धयादीगु दु । वि.सं. २०७२ साल चैतय् स्वीडिस कम्पनी टेलियां मलेसियाली कम्पनी एक्जियाटयात ८० प्रतिशत शेयर मियावंगु खः । स्वदँ न्ह्यव हे थ्व कारोवारय् पूँजीगत लाभकर कथं ३५ अर्ब ध्यबा म्हयेमाःगु खँ महालेखा परीक्षकया कार्यालयं धाःगु खः । लिपा ठूला करदाता कार्यालयं ६१ अर्ब तका कर निर्धारण याःगु खः ।

सम्बन्धित बुखँ

LEAVE YOUR COMMENTS