रियल इस्टेट कम्पनीपाखें नं पुँजीगत लाभकर कायेगु तयारी

येँ – छेँ जग्गाया कारोवार याइगु रियल इस्टेट कम्पनीतय्पाखें नं पुँजीगत लाभकर काइगु जूगु दु । थुकिया निंतिं आन्तरिक राजश्व विभागपाखें तयारी यानाच्वंगु खँ सीदुगु दु । विभागं रियल इस्टेटय् पुँजीगत लाभकर कायेगु निंतिं थीथी मालपोत कार्यालयलिसे तःगू चरणय् वार्ता यायेधुंकूगु खँ धाःगु दु । विभागं देय्न्यंकंया रियल इस्टेट कम्पनीतय्त पुँजीगत लाभकर लागू यायेगु तयारी याःगु खः ।

विभागं स्वनिगःया च्यागुलिं मालपोत कार्यालयलिसे सहलह यानाः रियल स्टेट कम्पनीतय्त पुँजीगत लाभकरया दायराय् हयेगु निर्णय यायेधुंकूगु दु । वंगु फागुनय् जूगु सहलहय् चैत तकया दुने देय्न्यंकं पुँजीगत लाभकर लागु यायेगु निर्णय याःगु खः । थौंकन्हय् कलंकी मालपाते कार्यालयय् जक रियल स्टेट कम्पनीतय्त थ्व कर लागु यानाच्वंगु दु ।

कलंकी जक लागु यानाच्वंगु कारणं घरजग्गा व्यवसायीतय्सं थःपिं दोहोरो मारय् लाःगु धासें थुकियात खारेज यायेमाःगु माग यानाच्वंगु दु । मेमेगु मालपोत मकायेगु, तर कलंकी जक कायेगुया छुं अर्थ मदु व थ्व कर ऐन अःखः जूगु द्वपं नं व्यवसायीतय् दु । व्यवसायीतय् विरोध जुयाच्वंसां आन्तरिक राजश्व विभागं धाःसा देय्न्यंकंया कम्पनीयात पुँजीगत लाभकरया दायराय् हयेगु निंतिं याकनं हे परिपत्र जारी यायेगु तयारी यानाच्वंगु दु ।

व्यवसायीतय्सं हाउजिङ्ग थेंज्याःगु परियोजना विकास यायेबलय् जग्गा विकासय् जूगु खर्च, बैंकया ब्याज, स्वायेबलय् जग्गाया भाः न्यानाबलय् स्वयां मीबलय् थहां वनीगु जूगुलिं न्यायेगु व मीगु दथुया भावय् वःगु अन्तरय् लाभकर कायेगु व्यवहारीक मजूगु तर्क तया वयाच्वंगु दु ।

विभागं न्हापांगु चरणय् स्वनिगःया च्यागुलिं मालपोत कार्यालयं निं पुँजीगत लाभकर उठे यायेत्यंगु दु । थ्व धुंकाः बुलुहुँ देय्न्यंकं लागू याइगु खँ दु ।आर्थिक ऐन २०७५ या व्यवस्थाया बः कयाः रियल इस्टेट कम्पनीयात पुँजीगत लाभकर कायेगु निर्णय जूगु खँ धाःगु दु । आन्तरिक राजश्व विभागया महानिर्देशक गोकर्णमणी दुवाडीं धयादीगु दु, ‘आर्थिक ऐन कथं लाभकर कायेबलय् छगू मालपोत कार्यालयय् जक लगे जुइगु, मेथाय् लगे जुइ धयागु जुइमखु ।

ऐन सकसियां निंतिं खः, उकिं स्वनिगलय् लागु जुलकि मेमेथाय् नं लागु जुयावनी ।’घरजग्गा व्यवसायीतय्सं धाःसा सरकारं थःपिंपाखें आयकर नं कयाच्वंगु जूगुलिं आः हाकनं पुँजीगत लाभकर काल धाःसा थःपिं दोहोरो करया मारय् लाइगु खँ धाःगु दु । कम्पनीं दँय्दसं आयकर वापत २५ प्रतिशत कर पुलाच्वंगु जूगुलिं हाकनं पुँजीगत लाभकर कायेगु व्यावहारिक मजूगु तर्क उमिगु दु ।

पुँजीगत लाभकर म्हयाच्वंगु कलंकी मालपाते कार्यालयं धाःसा छेँ, जग्गा कारोवारया इलय् पुँजीगत लाभकर पुल धाःसा आयकर पुलेबलय् लाभकरया रकम कट्टा यायेदुगुलिं दोहोर मारय् मलाइगु खँ धाःगु दु । व्यवसायीतय्सं हाउजिङ्ग थेंज्याःगु परियोजना विकास यायेबलय् जग्गा विकासय् जूगु खर्च, बैंकया ब्याज, स्वायेबलय् जग्गाया भाः न्यानाबलय् स्वयां मीबलय् थहां वनीगु जूगुलिं न्यायेगु व मीगु दथुया भावय् वःगु अन्तरय् लाभकर कायेगु व्यवहारीक मजूगु तर्क तया वयाच्वंगु दु ।