नेपालय् अर्गानिक कृषियात विकास यायेमाः ः कृषि मन्त्री

येँ – एशियन कृषि सम्मेलन म्हिगः निसें न्ह्याःगु दु । कृषि तथा पशुपन्छी विकास मन्त्री चक्रपानी खनालं म्हिगः उलेज्या यासें सम्मेलन न्ह्याःगु खः । सम्मेलनया उलेज्या लिपा न्ववायेगु झ्वलय् मन्त्री खनालं नेपालय् कृषिइ युवापिंत आकर्षित याये मफुगु धासें झिदँ न्ह्यः भुटान, बंगलादेश, श्रीलंका व भारत गन दुगु खः थौंकन्हय् अन मदुगु धासें नेपाःया कृषियात नं उकथं विकास यायेमाःगु खँ कनादिल ।

अन्तर्राष्ट्रिय युवा दिवसया झ्वलय् फोर एच नेपालं ग्वसाः ग्वःगु ज्याझ्वलय् न्ववायेगु झ्वलय् मन्त्री खनालं नेपाःया कृषि क्षेत्र विकासया निंतिं अर्गानिक व आधुनिक परियोजना विस्तार यायेगु ज्या जूगु धासें आः वइगु झिदँया दुने हिउपाः वइगु दावी नं यानादिल । वय्कलं नेपालय् कृषिं मजुयाच्वंगु मखुसें युवातय्त आकर्षित यायेमफुगु खँ धाःसा स्वीकार यानादिल ।

वय्कलं युवातय्त कृर्षि आकर्षित यायेत बः बीमाःगु खँ कनादिसें युवात आः गुकथं वैदेशिक रोजगारया निंतिं वनेत बाध्य जुयाच्वंगु दु । यदि नेपाय् हे रोजगार सिर्जना यानाः राज्य प्रति जिम्मेवार दयेकेमाःगु खँ नं कनादिल । वय्कलं थौंकन्हय् नेपाःया कृषिया स्थिति न्हापा राजतन्त्र दुगु इलय् स्वयां बामलानाच्वंगु खँ कनादिसें उकियात भिंकेमाःगु आवश्यकता जुयाच्वंगु खँ नं कनादिल ।

नेपालय् आः अर्गानिक कृषिया विकल्प मदुगु खँ धासें मन्त्रालयं कृषिइ रोजगारी वृद्धि यायेगु निंतिं कार्यदलं तयार याःगु प्रतिवेदन प्रधानमन्त्रीयात लः ल्हायेगु ज्या ल्यं दनिगु खँ कनादिल । नेपाःया कृषियात आधुनिकीकरण यायेगु, यान्त्रिकीकरण यायेगु व बजारी करण यायेगु निंतिं कृषि तथा पशुपन्छि विकास मन्त्रालय, भूमि व्यवस्थापन, कृषि तथा सहकारी मन्त्रालय ३ नम्बर प्रदेशया सहकार्य जूगु ज्याझ्वः थौं तक न्ह्याइगु खँ धाःगु दु ।

ज्याझ्वलय् कृषिइ युवा सहभागिता, नेपाःया कृषि उत्पादनया बजारीकरण, जलवायु परिवर्तन व नेपाःया नसा ँज्वलं, संस्कृति लगायत विषयसं अन्तर्राष्ट्रिय व राष्ट्रिय ब्वति काःपिंसं कार्यपत्र न्ह्यब्वइगु, प्लेनरी शत्र, अनुभव आदान प्रदान व नेटवर्किङ व नेतृत्व विकासया बारे सहलह जुइगु खँ धाःगु दु ।